जीवन सोनवणे, संपादक
राजगड : “पाणी कधी येणार?” हा प्रश्न सुरवड गावातील नागरिकांना रोजच पडत आहे. राजगड तालुक्यातील सुरवड गावात नोव्हेंबर २०२५ पासून पाणीपुरवठ्याची समस्या गंभीर बनली असून आजही ग्रामस्थांना नियमित पाणी मिळत नसल्याने संतापाची लाट उसळली आहे. विशेष म्हणजे गावात दोन विहिरी आणि दोन पाण्याच्या टाक्या उपलब्ध असतानाही नागरिकांना पिण्याच्या पाण्यासाठी वणवण भटकावे लागत आहे.
सुरवड गावाची लोकसंख्या सुमारे ७०० ते ८०० इतकी आहे. रोजगाराच्या अभावामुळे अनेक कुटुंबे स्थलांतरित झाली असली तरी गावात वास्तव्यास असलेल्या नागरिकांना आजही पाण्यासारख्या मूलभूत सुविधेसाठी संघर्ष करावा लागत आहे. ग्रामीण भागात पिण्याच्या पाण्याचा प्रश्न नवीन नसला तरी सुरवडमधील परिस्थिती दिवसेंदिवस अधिक गंभीर होत असल्याची भावना ग्रामस्थ व्यक्त करत आहेत.
गावातील महिला, ज्येष्ठ नागरिक आणि विद्यार्थ्यांचे पाण्याअभावी मोठे हाल होत आहेत. अनेक महिलांना दररोज लांब अंतरावरून पाणी आणावे लागत असून वयोवृद्ध नागरिकांनाही डोक्यावर हंडे घेऊन पाण्यासाठी फिरावे लागत आहे. उन्हाळ्याच्या संपूर्ण कालावधीत ग्रामस्थांनी पाण्यासाठी मोठा संघर्ष केला. मात्र पावसाळा तोंडावर आला तरी परिस्थितीत कोणतीही सुधारणा झालेली दिसून येत नाही.
ग्रामस्थांच्या म्हणण्यानुसार, ग्रामपंचायतीकडे वारंवार तक्रारी करूनही केवळ आश्वासनांवर वेळ मारून नेण्याचे काम सुरू आहे. “उद्या पाणी येईल”, “परवा पाणी येईल”, “काम सुरू आहे” अशा प्रकारची उत्तरे गेल्या अनेक महिन्यांपासून दिली जात आहेत. मात्र प्रत्यक्षात गावातील बहुतांश भागातील नळ कोरडेच असल्याचा आरोप नागरिकांनी केला आहे.
विशेष म्हणजे ग्रामस्थ नियमितपणे ग्रामपंचायतीकडे पाणीपट्टी भरत आहेत. मात्र त्याबदल्यात त्यांना अपेक्षित सुविधा मिळत नसल्याने नाराजी वाढली आहे. अनेक कुटुंबांना खासगी बोरवेलधारकांकडून पैसे मोजून पाणी विकत घ्यावे लागत आहे. त्यामुळे एकीकडे कर भरायचा आणि दुसरीकडे पाण्यासाठी अतिरिक्त खर्च करायचा, अशी दुहेरी आर्थिक झळ नागरिकांना सहन करावी लागत आहे.
गावात दोन विहिरी आणि दोन पाण्याच्या टाक्या असताना नेमकी अडचण कुठे आहे, याबाबत ग्रामस्थांमध्ये संभ्रम आहे. जलस्रोत उपलब्ध असूनही पाणीपुरवठा सुरळीत होत नसल्याने ग्रामपंचायतीच्या नियोजनावर आणि कारभारावर प्रश्नचिन्ह उपस्थित होत आहे. प्रशासनाकडून या समस्येची गांभीर्याने दखल घेतली जात नसल्याची भावना देखील नागरिकांमध्ये आहे.
स्थानिक लोकप्रतिनिधींनीही या प्रश्नावर अधिक प्रभावी भूमिका घेण्याची गरज असल्याचे मत ग्रामस्थ व्यक्त करत आहेत. पिण्याच्या पाण्यासारख्या मूलभूत प्रश्नासाठी नागरिकांना महिनोनमहिने झगडावे लागत असताना प्रशासन आणि लोकप्रतिनिधी यांच्यातील समन्वयाचा अभाव स्पष्टपणे दिसून येत असल्याची चर्चा गावात आहे.
सुरवडकरांच्या संयमाचा अंत होत असून आता प्रशासनाने केवळ आश्वासने न देता प्रत्यक्ष कृती करावी, अशी मागणी जोर धरत आहे. पाणीपुरवठा तातडीने सुरळीत न झाल्यास ग्रामस्थ आंदोलनाचा मार्ग स्वीकारण्याच्या तयारीत असल्याची माहिती पुढे येत आहे.
पिण्याच्या पाण्यासारख्या मूलभूत सुविधेसाठी २०२६ मध्येही नागरिकांना संघर्ष करावा लागत असेल, तर ही बाब ग्रामपंचायत, प्रशासन आणि संबंधित यंत्रणांसाठी निश्चितच चिंतनाची ठरणार आहे. सुरवड गावातील नागरिकांची तहान नेमकी कधी भागणार, याकडे आता संपूर्ण राजगड तालुक्याचे लक्ष लागले आहे.
