राजगड प्रतिनिधी : राजगड तालुक्यात सुरू असलेल्या मुसळधार पावसामुळे वेल्हे-वांगणी जिल्हा परिषद गटातील अनेक ठिकाणी गंभीर परिस्थिती निर्माण झाली आहे. केळद खिंड, बार्शीमाळ, बालवड येथील साकव पूल, पासली प्राथमिक आरोग्य केंद्र तसेच भट्टी खिंड परिसरात दरडी कोसळणे, रस्ते खचणे आणि वाहतुकीवर परिणाम झाल्याने स्थानिक नागरिकांमध्ये चिंतेचे वातावरण आहे.
या परिस्थितीची माहिती मिळताच जिल्हा परिषद सदस्य तानाजी बाप्पू मांगडे यांनी तात्काळ घटनास्थळी भेट देऊन परिस्थितीची पाहणी केली. त्यांनी प्रशासकीय अधिकाऱ्यांसमवेत विविध ठिकाणांचा आढावा घेत नागरिकांच्या सुरक्षिततेला सर्वोच्च प्राधान्य देण्याच्या सूचना दिल्या.
यावेळी बोलताना मांगडे म्हणाले, “संकट कितीही मोठे असले तरी जनतेला एकटे सोडणार नाही. नागरिकांनी घाबरून न जाता संयम बाळगावा. प्रशासन आणि लोकप्रतिनिधी सर्वतोपरी मदतीसाठी सज्ज आहेत.”
दरम्यान, परिस्थितीचे गांभीर्य लक्षात घेऊन भोर-राजगड-मुळशी विधानसभा मतदारसंघाचे आमदार शंकरभाऊ मांडेकर यांनी राज्याच्या उपमुख्यमंत्री तथा पुणे जिल्ह्याच्या पालकमंत्री सुनेत्रावहिनी अजितदादा पवार यांच्याशी संपर्क साधून तातडीने मदत व आवश्यक यंत्रणा कार्यान्वित करण्याची मागणी केली.
पंचायत समिती सदस्या सिताताई नंदकुमार खुळे यांनीही घटनास्थळी उपस्थित राहून प्रशासनाशी समन्वय साधत मदतकार्याचा आढावा घेतला.
या पाहणीवेळी प्रांत अधिकारी खरात, तहसीलदार श्रीनिवास ढाणे, गटविकास अधिकारी ढमाळ, सार्वजनिक बांधकाम विभागाचे उपअभियंता मोकाशी, कनिष्ठ अभियंता झेंडे, पंचायत समिती सदस्या सिताताई नंदकुमार खुळे तसेच राष्ट्रवादी काँग्रेस पक्षाचे भोर विधानसभा मतदारसंघ सोशल मीडिया अध्यक्ष संतोष वालगुडे उपस्थित होते.
