पुणेः प्रतिनिधी वर्षा काळे
भाजपेने सत्ताधारी शहरातील नाल्यांना सीमा भिंत बांधण्यासाठी राज्य सरकारने महापालिकेने मंजूर केलेला २०० कोटी रुपयांचा निधी भाजपचे आमदार असलेल्या पाच विधानसभा मतदारसंघात देण्यात आल्याचा आरोप केला जात आहे. तसेच महायुतीमध्ये सहभागी असलेल्या राष्ट्रवादी काँग्रेसच्या आमदारांच्या मतदारसंघात या निधीतील एक रुपया देखील देण्यात आला नसल्याची माहिती सूत्रांनी दिली आहे. २०१९ पूर्वी पुणे शहरात झालेल्या मुसळधार पावसामुळे शहरातील प्रमुख नाला असलेल्या आंबिल ओढ्याला पूर आला होता. पुराचे पाणी अनेक सोसायट्यांमध्ये घुसले. तर काही सोसायट्यांच्या सीमा भिंती कोसळून मोठे नुकसान झाले. त्यामुळे नाल्यांना येणारा पूर रोखण्यासाठी सीमा भिंत बांधणे आवश्यक असल्याने महापालिकेने काही ठिकाणी भिंती बांधल्या, तर काही भागात पूल बांधले. इतर भागात तांत्रिक कारणामुळे पालिकेला हे काम करता आले नाही. हे काम करता यावे यासाठी राज्य सरकारने विशेष निधी म्हणून २०० कोटी रुपयांचा निधी महापालिकेला दिलेला आहे.
भाजपप्रणित मतदार संघातील आमदारांसाठी निधीची खैरात
या कामांची निविदा काढताना महापालिका प्रशासनाने भाजपचे आमदार असलेल्या विधानसभा मतदारसंघातील कामांची यादी राज्य सरकारकडून मंजूर करून घेतली आहे. यामध्ये खडकवासला विधानसभा मतदारसंघासाठी ४१.२३ कोटी, शिवाजीनगरसाठी २४.८० कोटी, पर्वतीसाठी ४१.१५ कोटी, कोथरूडसाठी १९.९० कोटी, कॅन्टोंन्मेंट मतदारसंघासाठी ३९.०४ कोटी रुपयांची निविदा काढली आहे.
अजित पवारांच्या राष्ट्रवादीला निधी नाही?
महायुतीत एकनाथ शिंदे- देवेंद्र फडणवीस सरकारमध्ये सहभागी झालेल्या उपमुख्यमंत्री अजित पवार यांच्या राष्ट्रवादी काँग्रेसचे आमदार असलेल्या वडगावशेरी, हडपसर तसेच काँग्रेसचे आमदार रविंद्र धंगेकर असलेल्या कसबा विधानसभा मतदारसंघात एक रुपयाचा देखील निधी देण्यात आलेला नाही. अशी माहिती मिळत आहे. तसेच जिल्हाधिकाऱ्यांकडून याला प्रशासकीय मान्यता घेतली आहे. यामुळे आता या निधीवाटपवरुन वाद होण्याची शक्यता वर्तवण्यात येत आहे.
