नसरापूर : नसरापूर–वेल्हा रोडलगत जांभळी (ता. भोर) गावच्या हद्दीत असलेल्या ‘७/१२ शेतकरी व्हेज-नॉनव्हेज हॉटेल’मध्ये एक अत्यंत धक्कादायक खून प्रकरण उघडकीस आले आहे. हॉटेल मालकाच्या सासऱ्याचा हॉटेलमधील कामगाराने निर्घृण खून केल्याची माहिती समोर आली असून पोलिसांनी अवघ्या सहा तासांत आरोपीला अटक करत वेगवान कारवाई केली आहे. सागर लक्ष्मण कुमार राणा (वय २०, मूळ रा. पाटण जिल्हा बैतडी, देश नेपाळ) असे अटक करण्यात आलेल्या आरोपीचे नाव आहे. तर किसन बापू सुर्वे (वय ७५, सध्या रा. जांभळी, मूळ रा. भोंगवली ता. भोर) असे मृत व्यक्तीचे नाव आहे.
या प्रकरणी अनिल सखाराम रसाळ (वय ४८, धंदा शेती/हॉटेल, रा. jांभळी ता. भोर जि. पुणे) यांनी फिर्याद दिली आहे.
पोलिसांनी दिलेल्या माहितीनुसार, दि. २४ मार्च रोजी रात्री ११.०० ते दि. २५ मार्च रोजी सकाळी ९.०० वाजण्याच्या दरम्यान ही घटना घडली. सुर्वे हे नेहमीप्रमाणे हॉटेलमध्ये झोपलेले असताना आरोपी सागर लक्ष्मण कुमार राणा याने त्यांच्यावर जीवघेणा हल्ला केला.
फिर्यादीत नमूद केल्याप्रमाणे, आरोपीने मोबाईल घेऊन न दिल्याच्या कारणावरून राग मनात धरला होता. याच रागातून त्याने सुर्वे यांच्या डोक्यात बोथट हत्याराने वार करून त्यांना गंभीर जखमी केले. या हल्ल्यात त्यांचा जागीच मृत्यू झाल्याचा प्राथमिक अंदाज आहे.
घटना उघडकीस आल्यानंतर राजगड पोलिसांनी तत्काळ तपास सुरू केला. आरोपी फरार झाल्याने पोलिसांनी शोधमोहीम हाती घेतली.
चौकट : ६ तासांत कात्रज चौकातून आरोपी जेरबंद
पोलीस निरीक्षक राजेश गवळी यांना गोपनीय बातमीदारामार्फत माहिती मिळाली की, सदर गुन्ह्यातील आरोपी सागर लक्ष्मण कुमार राणा हा कात्रज चौकात थांबला असून नेपाळला पळून जाण्याच्या तयारीत आहे. घटनेचे गांभीर्य लक्षात घेऊन तात्काळ दोन पथके कात्रज चौक येथे रवाना करण्यात आली. पोलिसांनी सापळा रचत त्याला ताब्यात घेतले.
या प्रकरणाचा पुढील तपास सहायक पोलीस निरीक्षक राठोड करत आहेत. या कारवाईत पोलीस उपनिरीक्षक अजित पाटील, पोलीस हवालदार मदने, निबांळकर तसेच पोलीस अंमलदार नलावडे, कुंभार, भालेराव आणि भडाळे यांनी सहभाग घेत महत्त्वाची कामगिरी बजावली.
