नसरापूर : पुणे जिल्ह्यातील स्थानिक गुन्हे अन्वेषण शाखेने उत्कृष्ट कामगिरी करत तब्बल सहा वर्षांपासून फरार असलेल्या तसेच १८ गुन्हे दाखल असलेला व त्याच्यावर दोन वेळा मोक्का अंतर्गत कारवाई करण्यात आलेल्या आरोपीला जेरबंद करण्यात यश मिळवले आहे.
पोलिसांनी दिलेल्या माहितीनुसार,दि. २७ मार्च २०२६ रोजी स्थानिक गुन्हे अन्वेषण शाखेचे पथक हवेली पोलीस स्टेशन हद्दीत नियमित पेट्रोलिंग करत होते. यावेळी गोपनीय बातमीदारामार्फत महत्त्वाची माहिती मिळाली. त्यानुसार, कुलदिप हरिओम वाल्मिकी (वय ३२, रा. एनडीए रोड, सरस्वती चौक, उत्तम नगर, ता. हवेली, जि. पुणे) हा आरोपी आगळंबे फाटा येथे थांबलेला असल्याची खात्रीशीर माहिती मिळाली.
माहितीची शहानिशा करून पोलिसांनी तत्काळ सापळा रचला आणि आरोपीला ताब्यात घेतले. त्याची सखोल चौकशी केली असता, तो राजगड पोलीस स्टेशन येथे दाखल असलेल्या दरोड्याच्या गुन्ह्यातील फरार आरोपी असल्याचे उघड झाले. तसेच तो फरार यादी क्रमांक २२२१/२५ मध्ये समाविष्ट असल्याचेही स्पष्ट झाले.
विशेष म्हणजे, आरोपीवर यापूर्वी तब्बल १८ गुन्हे दाखल असून त्याच्यावर दोन वेळा मोक्का अंतर्गत कारवाई करण्यात आली आहे. त्यामुळे तो पोलिसांसाठी डोकेदुखी ठरला होता. त्याच्या अटकेमुळे अनेक प्रलंबित गुन्ह्यांच्या तपासाला गती मिळण्याची शक्यता व्यक्त केली जात आहे.
अटक करण्यात आलेल्या आरोपीला पुढील कायदेशीर कारवाईसाठी राजगड पोलीस स्टेशनच्या ताब्यात देण्यात आले आहे.
ही कारवाई वरिष्ठांच्या मार्गदर्शनाखाली स्थानिक गुन्हे अन्वेषण शाखेच्या पथकाने यशस्वीरीत्या पार पाडली. या पथकात पोलिस उपनिरीक्षक अभिजित सावंत, महेश बनकर, सागर नामदास, अमोल शेडगे, मंगेश भगत व तुषार भोईटे यांचा समावेश होता.
