भोर (इम्रान आतार) : तालुक्यातील नवलाई मंदिराजवळ मंगळवार (दि. ५) रोजी सकाळच्या सुमारास भीषण अपघात घडला. एसटी बस आणि इको कार यांच्यात समोरासमोर जोरदार धडक होऊन इको गाडीतील एका तरुणाचा जागीच मृत्यू झाला, तर इतर काही प्रवासी गंभीर जखमी झाले आहेत. या घटनेमुळे परिसरात खळबळ उडाली आहे.
मिळालेल्या माहितीनुसार, रामबाग मार्गावर भोर एसटी डेपोकडे येणारी एसटी बस (एमएच ०६ एस ८२९४, भोर–दुर्गाडी–भोर) आणि एसटी डेपोकडून रामबागकडे जाणारी इको कार (एमएच ०५ सीएम ५७५२) यांच्यात समोरासमोर धडक झाली. धडकेचा जोर इतका होता की इको गाडीचा पुढील भाग पूर्णपणे चेंदामेंदा झाला.
अपघातात इको गाडीतील एका तरुणाचा जागीच मृत्यू झाल्याची माहिती समोर आली असून त्याची ओळख पटवण्याचे काम सुरू आहे. तसेच गाडीत असलेले इतर प्रवासी गंभीर जखमी झाले असून त्यांना तातडीने स्थानिक नागरिकांच्या मदतीने जवळच्या रुग्णालयात दाखल करण्यात आले आहे. काहींची प्रकृती चिंताजनक असल्याचे सांगितले जात आहे.
घटनेची माहिती मिळताच पोलिस प्रशासन तात्काळ घटनास्थळी दाखल झाले. त्यांनी पंचनामा करत पुढील तपास सुरू केला आहे. अपघाताचे नेमके कारण अद्याप स्पष्ट झाले नसून वेग, रस्त्याची स्थिती किंवा चालकाचे नियंत्रण सुटणे याबाबत तपास सुरू आहे.
या अपघातामुळे रामबाग मार्गावर काही काळ वाहतूक विस्कळीत झाली होती. स्थानिक नागरिकांनी तत्परतेने मदतकार्य करत जखमींना बाहेर काढले आणि वाहतूक सुरळीत करण्यास मदत केली.
दरम्यान, या दुर्दैवी घटनेमुळे भोर परिसरात हळहळ व्यक्त केली जात आहे. नागरिकांनी या मार्गावर वारंवार होणाऱ्या अपघातांच्या पार्श्वभूमीवर प्रशासनाने सुरक्षेच्या उपाययोजना कडक कराव्यात, अशी मागणी केली आहे.
