खेड शिवापूर : पुणे-बंगळुरू राष्ट्रीय महामार्गावरील खेड शिवापूर टोल नाक्याच्या पाठीमागील सातारा लेनवर शुक्रवारी दुपारी गॅस टँकर आणि दुचाकी यांच्यात झालेल्या भीषण अपघातात पती-पत्नीचा जागीच मृत्यू झाला. या दुर्घटनेमुळे परिसरात एकच खळबळ उडाली असून काही काळ महामार्गावरील वाहतूक विस्कळीत झाली होती.
पोलिसांनी दिलेल्या माहितीनुसार, वारजे माळवाडी (पुणे) येथील राजेंद्र बबन मोरे (वय ५५) आणि सविता राजेंद्र मोरे (वय ४२) हे मोटरसायकल क्रमांक एमएच १२ एफएच ४६९६ वरून साताऱ्याच्या दिशेने जात होते. याच वेळी गॅस टँकर क्रमांक एपी ०३ टीई ५७५९ याने दुचाकीला जोरदार धडक दिली. धडक इतकी भीषण होती की दुचाकीवरील दोघेही थेट टँकरखाली आले आणि त्यांचा जागीच मृत्यू झाला.
प्रत्यक्षदर्शींनी दिलेल्या माहितीनुसार, साताऱ्याकडे जाणाऱ्या लेनवर दोन्ही वाहने भरधाव वेगात होती. दरम्यान, टँकर चालकाचा वाहनावरील ताबा सुटल्याने हा अपघात घडल्याचा प्राथमिक अंदाज व्यक्त करण्यात येत आहे. धडकेनंतर दुचाकी काही अंतरावर फेकली गेली होती. अपघात पाहताच स्थानिक नागरिकांनी तातडीने मदतकार्य सुरू केले आणि पोलिसांना माहिती दिली. मात्र, गंभीर दुखापतीमुळे दोघांचाही घटनास्थळीच मृत्यू झाल्याचे स्पष्ट झाले.
अपघातानंतर घटनास्थळी नागरिकांची मोठी गर्दी झाली होती. संतप्त जमावाने गॅस टँकरची तोडफोड केल्याची माहिती समोर आली असून काही काळ परिसरात तणावपूर्ण वातावरण निर्माण झाले होते. परिस्थिती नियंत्रणात आणण्यासाठी पोलिसांनी तातडीने घटनास्थळी धाव घेत जमावाला शांत केले.
दरम्यान, पोलिसांनी वाहतूक सुरळीत करत पंचनामा सुरू केला. मृतदेह शवविच्छेदनासाठी रुग्णालयात पाठवण्यात आले असून टँकर चालक राज किशन बी. (रा. तिरुपुरम) याला पोलिसांनी ताब्यात घेतले आहे. या प्रकरणी पुढील तपास सुरू असल्याची माहिती पोलिसांकडून देण्यात आली.
