भोर [ प्रतिनिधी इम्रान आतार ] : तालुक्यातील महुडे खोऱ्यात मंगळवारी लाचलुचपत प्रतिबंधक विभागाने (एसीबी) केलेल्या कारवाईमुळे मोठी खळबळ उडाली. शिंद व गवडी गावांचे ग्रामसेवक महादेव नामदेव सालगुडे (रा. बारामती) यांना घरकुल योजनेचा दुसरा हप्ता मंजूर करून देण्यासाठी १५ हजार रुपयांची लाच स्वीकारताना एसीबीच्या अधिकाऱ्यांनी रंगेहाथ पकडले.
मिळालेल्या माहितीनुसार, संबंधित तक्रारदार हे शासनाच्या घरकुल योजनेचे लाभार्थी आहेत. घरकुलाच्या दुसऱ्या हप्त्याची रक्कम मंजूर करण्यासाठी ग्रामसेवक सालगुडे यांनी तक्रारदाराकडे १५ हजार रुपयांची मागणी केली होती. शासकीय कामासाठी पैशांची मागणी होत असल्याने तक्रारदाराने पुणे येथील लाचलुचपत प्रतिबंधक विभागाकडे तक्रार दाखल केली.
तक्रार प्राप्त झाल्यानंतर एसीबीच्या अधिकाऱ्यांनी प्राथमिक पडताळणी केली. चौकशीत तक्रारदाराने केलेल्या आरोपांमध्ये तथ्य आढळून आल्याने अधिकाऱ्यांनी सापळा रचला. मंगळवारी भोलावडे – शिंद मार्गावर ठरविण्यात आलेल्या ठिकाणी तक्रारदाराकडून १५ हजार रुपयांची रक्कम स्वीकारताना ग्रामसेवक सालगुडे यांना रंगेहाथ ताब्यात घेण्यात आले. या कारवाईनंतर परिसरात एकच चर्चा सुरू झाली असून नागरिकांनी एसीबीच्या धाडसी कारवाईचे स्वागत केले आहे.
घरकुलासारख्या सर्वसामान्य आणि गरजू नागरिकांसाठी असलेल्या योजनांमध्ये लाचेची मागणी होत असल्यामुळे ग्रामस्थांमध्ये संतापाचे वातावरण निर्माण झाले आहे. शासनाच्या विविध योजनांचा लाभ मिळवण्यासाठी नागरिकांना आर्थिक अडचणींचा सामना करावा लागत असल्याच्या तक्रारी यापूर्वीही समोर आल्या आहेत. त्यामुळे या कारवाईमुळे प्रशासनातील भ्रष्टाचार पुन्हा एकदा चर्चेचा विषय ठरला आहे.
दरम्यान, या प्रकरणी भोर पोलीस ठाण्यात गुन्हा दाखल करण्याची प्रक्रिया सुरू असून पुढील तपास लाचलुचपत प्रतिबंधक विभागाकडून करण्यात येत आहे. एसीबीच्या या कारवाईमुळे तालुक्यातील इतर शासकीय कार्यालयांमध्येही खळबळ उडाली असून भ्रष्ट अधिकाऱ्यांवर कारवाईचा धाक निर्माण झाला आहे.
