पुरंदर | तालुक्यातील मांडकी येथे पुणे ग्रामीण दहशतवाद विरोधी पथकाने (एटीएस) धडक कारवाई करत तब्बल २८ लाख रुपयांचा चंदनसाठा जप्त केला आहे. या कारवाईमुळे परिसरात मोठी खळबळ उडाली असून संबंधित आरोपीचा शोध पोलिसांकडून सुरू आहे.
पुणे जिल्हा पोलीस अधीक्षक संदीपसिंह गिल्ल यांच्या आदेशानुसार एटीएसचे पथक सासवड व जेजुरी परिसरात संशयित आरोपींचा शोध घेत होते. यावेळी वाल्हे परिसरात पथकाला खबऱ्यामार्फत माहिती मिळाली की, मांडकी येथील पाटील वस्ती परिसरातील एका शेतात मोठ्या प्रमाणात चोरीचे चंदन लपवून ठेवण्यात आले आहे.
मिळालेल्या माहितीच्या आधारे एटीएस पथकाने जेजुरी पोलिसांच्या मदतीने मांडकी येथे छापा टाकला. विलास रावजी भोसले यांच्या शेतात शोधमोहीम राबवली असता हिरव्या कापडाखाली लपवून ठेवलेले सुमारे ५६० किलो वजनाचे चंदनाचे ओंडके आढळून आले. यासोबतच झाडे कापण्यासाठी वापरण्यात येणारा बॅटरीवर चालणारा कटर आणि दोन लोखंडी ड्रिलही जप्त करण्यात आले. जप्त करण्यात आलेल्या मुद्देमालाची एकूण किंमत २८ लाख ५ हजार २०० रुपये इतकी असल्याचे समोर आले.
चौकशीदरम्यान हा चंदनसाठा प्रतिक प्रमोद खुंटे याने शेतात ठेवला असल्याची माहिती पुढे आली. मात्र, पोलिसांनी शोध घेतला असता तो फरार असल्याचे निष्पन्न झाले असून त्याचा शोध सुरू आहे.
दरम्यान, प्रतिक खुंटे हा सराईत गुन्हेगार असल्याची माहिती पोलिसांनी दिली. त्याच्यावर यापूर्वीही गंभीर स्वरूपाचे गुन्हे दाखल असल्याचे समोर आले आहे.
ही कारवाई पुणे जिल्हा पोलीस अधीक्षक संदीपसिंह गिल्ल, बारामती अपर पोलीस अधीक्षक गणेश बिरादार आणि जेजुरी पोलीस स्टेशनचे सहाय्यक पोलीस निरीक्षक दीपक वाकचौरे यांच्या मार्गदर्शनाखाली पार पडली. एटीएसचे सहाय्यक पोलीस निरीक्षक प्रकाश पवार, सहाय्यक पोलीस उपनिरीक्षक महेश गायकवाड, विशाल गव्हाणे, पोलीस हवालदार निलेश कदम, रविंद्र जाधव, पोलीस अंमलदार मोसीन शेख, ओंकार शिंदे, जालिंदर मुळीक तसेच पोलीस उपनिरीक्षक केशव जगताप यांच्या पथकाने ही यशस्वी कारवाई केली.
