भोर : जिल्हा वार्षिक योजना २०२६-२७ अंतर्गत भोर, राजगड आणि मुळशी विधानसभा मतदारसंघातील विविध विकासकामांसाठी मोठ्या प्रमाणात निधी उपलब्ध करून द्यावा, अशी मागणी आमदार शंकर मांडेकर यांनी केली आहे. उपमुख्यमंत्री तथा पुणे जिल्ह्याच्या पालकमंत्री अजित पवार यांच्या अध्यक्षतेखाली झालेल्या बैठकीत त्यांनी विविध प्रश्न मांडले.
या बैठकीत पाणीपुरवठा योजना, रस्ते, पाटबंधारे, आरोग्य सुविधा, सार्वजनिक बांधकाम, क्रीडा तसेच वाहतूक व्यवस्थेच्या विकासासाठी वाढीव निधी देण्याची मागणी करण्यात आली. जलजीवन मिशन अंतर्गत अनेक कामे अपूर्ण असल्याने ती तातडीने पूर्ण करण्यासाठी निधी मंजूर करावा, असेही त्यांनी स्पष्ट केले. काही गावांमध्ये निकृष्ट दर्जाची कामे झाल्याच्या तक्रारी समोर आल्याने त्यांची चौकशी करून संबंधित कामांवर कारवाई करावी, अशी मागणीही त्यांनी केली.
मुळशी तालुक्यातील श्री वाघजाई देवी देवस्थान, राजगड परिसरातील विविध धार्मिक स्थळे तसेच भोरमधील ऐतिहासिक मंदिरांना ‘क’ वर्ग तीर्थक्षेत्राचा दर्जा देण्यात यावा, अशी मागणी बैठकीत करण्यात आली. यामुळे धार्मिक पर्यटनाला चालना मिळून स्थानिक रोजगाराच्या संधी वाढतील, असा विश्वास व्यक्त करण्यात आला.
डोंगरी व दुर्गम भागातील अनेक गावांमध्ये अद्यापही रस्ते, वीज आणि आरोग्य सुविधांचा अभाव असल्याचे आमदार मांडेकर यांनी निदर्शनास आणून दिले. महावितरण विभागासाठी अतिरिक्त निधी उपलब्ध करून द्यावा, तसेच आरोग्य विभागातील रिक्त पदे तातडीने भरावीत व रुग्णवाहिका सेवा अधिक सक्षम करावी, अशी मागणीही त्यांनी केली.
भोर आणि राजगड परिसरात नवीन क्रीडा संकुले उभारण्यासाठी निधी मंजूर करावा, तसेच वीर बाजी पासलकर स्मारकाच्या विकासासाठी विशेष निधी द्यावा, अशी मागणी करण्यात आली. याशिवाय भोर-मुळशी भागातील वाहतूक कोंडी कमी करण्यासाठी उपाययोजना राबवाव्यात आणि वन विभागाच्या प्रलंबित परवानग्या तातडीने मंजूर कराव्यात, असेही त्यांनी बैठकीत सांगितले.
