भोर, ९ फेब्रुवारी २०२५ – तालुक्यातील वेनवडी गावात आर्थिक वादातून एका युवकाची निर्घृण हत्या झाल्याची धक्कादायक घटना घडली आहे. ही घटना ८ फेब्रुवारी रोजी रात्री ८:३० च्या सुमारास घडली. मृत व्यक्तीचे नाव विक्रम दादासाहेब गायकवाड (वय ३०, रा. उत्रौली, ता. भोर, जि. पुणे) असे आहे.
या प्रकरणी भोर पोलीस ठाण्यात तक्रार दाखल करण्यात आली असून, फिर्याद सागर दादासाहेब गायकवाड यांनी दिली आहे. त्यांच्या तक्रारीनुसार, विक्रम गायकवाड याने संशयित आरोपी अनुज मल्हारी चव्हाण (वय २४, रा. वेनवडी, ता. भोर) याच्याकडे हात उसने दिलेले पैसे परत मागितले होते. यावरून दोघांमध्ये वाद झाला. वाद विकोपाला गेल्यानंतर संतप्त झालेल्या अनुज चव्हाण याने धारदार शस्त्राने विक्रमवर अनेक वार केले. गंभीर जखमी झाल्यामुळे विक्रमचा जागीच मृत्यू झाला.
घटनेची माहिती मिळताच भोर पोलिसांनी तातडीने घटनास्थळी धाव घेतली. पोलीस उपअधीक्षक दिलीप पांडुरंग शिंदे यांच्या मार्गदर्शनाखाली पोलीस निरीक्षक अण्णा पवार आणि त्यांची टीम या घटनेचा तपास करत आहे. प्राथमिक चौकशीत आर्थिक देवाणघेवाणीच्या कारणावरून हा वाद उफाळल्याचे स्पष्ट झाले आहे.
