मुळशीः महायुतीचे उमेदवार शंकर मांडेकर यांच्या प्रचारार्थ घेतलेल्या सभेत अजित पवार यांनी संग्राम थोपटे यांच्यावर टीकास्त्र डागले. पवार यांनी थोपटे यांच्यावर टीका करीत अनेक सवाल उपस्थित केले आहेत. १५ वर्षांमध्ये विद्यमान आमदारांनी या मतदार संघातील प्रश्नांची सोडवणूक केली का? असा सवाल प्रामुख्याने अजित पवार यांनी उपस्थित केला. तसेच गेल्या अनेक वर्षांपासून एमआडीसीचे स्वप्न दाखविण्यात आल्याचे पवारांनी सांगितले. संग्राम थोपटे यांच्या हातामध्ये सहकारी साखर कारखाना आहे, त्या नावाला साजेसे काम चालले आहे का? तुम्हाला गेल्या अनेक वर्षांमध्ये कारखाना उर्जित करता येत नाही. मग काय तुम्ही लोकांना न्याय देणार असा प्रश्न पवारांनी थोपटे यांना केला आहे.
विद्यमान आमदारांना मुळशीच्या मार्किट कमिटीला न्याय देता आला नाही. खरेदी विक्री संघाची तिच अवस्था आहे. रोजगारासाठी प्रयत्न केले नाहीत. पर्यटनाला चालना देण्यासाठी कोणत्याही प्रकारचा प्रयत्न केला नाही. गड किल्ल्यांचे संवर्धन करायचे असते यासाठी वाचा फोडली का, सभागृहात कधी प्रश्न केले का, कोणती ठोस भूमिका घेतली का, असे एक ना अनेक प्रश्नांचा पाढाच अजित पवारांनी थोपटे यांनी केला आहे. यामुळे अजित पवारांनी युतीचे उमेदवार शंकर मांडेकर यांच्या सभेतून टीकेचे बाण थोपटे यांच्यावर डागले आहेत.
