भोर : दौंड तालुक्यातील केडगाव येथे उघडकीस आलेल्या बेकायदेशीर गर्भलिंग निदान रॅकेटमुळे संपूर्ण पुणे जिल्हा हादरला असताना, या प्रकरणाचे धागेदोरे भोर तालुक्यापर्यंत पोहोचल्याची चर्चा नागरिकांमध्ये रंगू लागली आहे. किकवी येथील डॉक्टर मंदार सुरेश माळी यांच्यावर गुन्हा दाखल झाल्यानंतर तालुक्यात या प्रकरणाबाबत विविध तर्क-वितर्कांना उधाण आले आहे.
यवत पोलिसांनी केलेल्या कारवाईत मुख्य आरोपी अण्णासाहेब गिरी याला अटक करण्यात आली असून, डॉ. अतुल अंकुश जाधव, नरेंद्र साहेबराव ठाकरे, डॉ. मंदार सुरेश माळी आणि सुंदरम कदम यांच्याविरोधात गुन्हा दाखल करण्यात आला आहे. पोलिस तपासात पोर्टेबल सोनोग्राफी मशीनच्या माध्यमातून बेकायदेशीर गर्भलिंग निदान केल्याचा आरोप असून, या रॅकेटमधून गेल्या दोन वर्षांत ५०० हून अधिक गर्भपात झाल्याची धक्कादायक माहिती समोर आली आहे.
किकवीच्या डॉक्टरावर गुन्हा दाखल झाल्यानंतर भोर तालुक्यात या प्रकरणाची चर्चा अधिक तीव्र झाली आहे. काही नागरिकांकडून या रॅकेटचा संबंध भोर तालुक्यातील इतर काही डॉक्टरांशी किंवा वैद्यकीय क्षेत्राशी संबंधित व्यक्तींशी असू शकतो का, असा प्रश्न उपस्थित केला जात आहे. तसेच प्राथमिक आरोग्य केंद्रातील काही कर्मचाऱ्यांच्या भूमिकेबाबतही नागरिकांमध्ये चर्चा सुरू असल्याचे बोलले जात आहे.
मात्र, भोर तालुक्यातील इतर कोणत्याही डॉक्टरांचा किंवा प्राथमिक आरोग्य केंद्रातील कर्मचाऱ्यांचा या प्रकरणाशी संबंध असल्याबाबत अद्याप कोणतीही अधिकृत माहिती समोर आलेली नाही. पोलिस किंवा आरोग्य विभागाने अशा कोणत्याही सहभागाची पुष्टी केलेली नाही. त्यामुळे या सर्व बाबी सध्या चर्चेच्या आणि तपासाच्या पातळीवर असल्याचे स्पष्ट करण्यात येत आहे.
दरम्यान, या प्रकरणाची व्याप्ती मोठी असल्याने संपूर्ण तपास उच्चस्तरीय पातळीवर करून संबंधित सर्व व्यक्तींची चौकशी करण्यात यावी, अशी मागणी नागरिकांकडून होत आहे. पुढील तपासात आणखी काही धक्कादायक माहिती समोर येण्याची शक्यता व्यक्त केली जात असून, संपूर्ण भोर तालुक्याचे लक्ष आता या प्रकरणाकडे लागले आहे.
