राजगड : २०३ भोर विधानसभा मतदारसंघाचे महाविकास आघाडी आणि मित्र पक्षांचे अधिकृत उमेदवार आमदार संग्राम थोपटे यांनी राजगड (वेल्हा) तालुक्यातील विविध गावांमध्ये भेट दौरा करत मतदारांशी संवाद साधला. कादवे, वरघड, आंबेगाव, शिरकोली, पोळे, माणगाव, टेकपोळे, घोल, दापसरे, गोंडखल, भालवडी, कोशिंमघर आणि आंबेगाव या गावांतील मतदार बांधव आणि भगिनींशी त्यांनी या दौऱ्यादरम्यान संवाद साधत त्यांच्या समस्या आणि मागण्या जाणून घेतल्या.
यावेळी बोलताना संग्राम थोपटे म्हणाले की, राजगड तालुक्यातील मावळे हे स्वाभिमानी असून, लोकसभा निवडणुकीत त्यांनी महाविकास आघाडीच्या उमेदवार सुप्रिया सुळे यांना मोठे मताधिक्य दिले होते. “विरोधकांनी विविध प्रलोभनं दाखवूनही राजगडमधील जनतेने आमच्यावर विश्वास ठेवला, आणि आपली साथ कायम ठेवली,” असे सांगत थोपटे यांनी मतदारांचे आभार मानले.
थोपटे यांनी पुढील काळात तालुक्यातील पाणी पुरवठा योजना, रस्ते, वीज, पूल, समाजमंदिर, शाळा इमारती, सभामंडप, प्रशासकीय इमारती तसेच राणीसाहेब सईबाई यांच्या समाधी स्थळासाठी निधी उपलब्ध करण्याचे आश्वासन दिले. “आपण आतापर्यंत अनेक महत्त्वाची विकासकामे मार्गी लावली आहेत, मात्र अजून काही प्रकल्प प्रलंबित आहेत, ज्यांची पूर्तता येत्या काळात करण्यात येईल,” असे त्यांनी ठामपणे सांगितले.
या दौऱ्यात वेल्हा तालुका काँग्रेसचे अध्यक्ष नाना राऊत, दिनकरराव धरपाळे, अमोल नलावडे, दुर्गा चोरघे, सीमाताई राऊत, अमोल पडवळ, प्रमोद लोहकरे, शिवराज शेंडकर, गणेश जागडे, शैलेश वालगुडे, राहुल ठाकर, बापू शिर्के, लक्ष्मण तावरे तसेच महाविकास आघाडीचे पदाधिकारी आणि कार्यकर्ते मोठ्या संख्येने उपस्थित होते.
