या मार्गावर एसटी चा वारंवार अपघात होत असल्याने प्रवासी नागरिक भयभीत
भोर – भोर तालुक्यातील महुडे मार्गावर आज गुरुवार दि.३१ रोजी दुपारी १२ च्या सुमारास पुन्हा एकदा भोर आगाराची एमएच ०६ एस ८१०५ ही एसटी बस समोरून येणाऱ्या वाहनाला साईड देताना पावसामुळे खराब झालेल्या पट्टीवरून घसरून गटारात खचल्याची घटना घडली . या बसमध्ये भोरकडे येणारे जवळपास १४ ते १५ महिला पुरुष प्रवासी चालक व वाहक होते. सर्वांना सुखरूप बाहेर काढण्यात आले असून एसटी मात्र गटारामध्ये फसली आहे असे किवतचे ग्रामपंचायत सदस्य अक्षय चव्हाण यांनी सांगितले .
मिळालेल्या माहितीनुसार सदरची एसटी ही महुडेत प्रवासी सोडून पुन्हा महुडेवरून भोरकडे निघाली होती . एसटीत भोरकडे जवळपास महिला , पुरुष १४ ते १५ प्रवासी एसटी बस मध्ये होते. समोरून येणाऱ्या वाहनाला साईट देताना साईटपट्टीवरून ही एसटी बस गटारात गेली..यावेळी बसमध्ये चालक व वाहक सुखरूप असल्याचे सांगण्यात आले. मात्र एसटी बसचे नुकसान झाले आहे
महिनाभरात याच मार्गावर तीन वेळा एसटी बस गटारात जाणाऱ्या घटना घडल्याने पुन्हा एकदा रस्त्याच्या साईट पट्टींचा प्रश्न ऐरणीवर आला आहे .स्थानिकांकडून सांगितलेल्या माहितीनुसार सार्वजनिक बांधकाम विभाग याकडे गांभीर्याने लक्ष देत नसून साईट पट्टी व रस्त्यांच्या खड्ड्यांबाबत तात्पुरती मलमपट्टी करत आहे परंतु रस्त्यावर एखादा मोठा खड्डा चुकविताना छोटे वाहन हे मोठ्या वाहनाच्या समोर येऊन पटकन बाजूला होत आहे त्यामुळे त्या वाहनाला बाजूला साईट देताना मोठी वाहने रस्ता अरुंद असल्याने व साईट पट्टी भरावाची नसल्याने गटारात पलटी होत आहे संबंधित प्रशासनाने रस्त्यांचे रुंदीकरण, रस्त्यावरील खड्डे ,साईट पट्ट्या मोठ्या भरावाच्या कराव्यात अशी मागणी या भागातील नागरिकांकडून होत आहे.
