शिरवळ, ता.खंडाळा – पुणे-सातारा महामार्गावर शिरवळ गावाजवळ उभ्या असलेल्या ट्रकला पुण्यावरून साताऱ्याकडे जाणाऱ्या स्कॉर्पिओ गाडीने मागून धडक दिल्याने भीषण अपघात झाला. या अपघातात दोन जण गंभीर जखमी झाले असून एक जण सुखरूप आहे. जखमींना शिरवळ येथील खाजगी रुग्णालयात उपचारासाठी दाखल करण्यात आले आहे.
मिळालेल्या माहितीनुसार, स्कॉर्पिओ (वाहन क्रमांक: एम एच ४३ ए ९६५८) पुण्यावरून साताऱ्याच्या दिशेने जात असताना शिरवळ येथे उभ्या असलेल्या ट्रकला मागून धडक दिली. या अपघातात कृष्णा भोसले (वय ३५, रा. पलूस, जि. सांगली) आणि जिज्ञासा जयसिंग कदम (वय १६, रा. कराड) हे गंभीर जखमी झाले आहेत. दरम्यान, चालक जगन्नाथ कदम हे सुखरूप आहेत.
अपघाताची माहिती मिळताच महामार्ग पोलीस आणि शिरवळ पोलीस त्वरित घटनास्थळी दाखल झाले. त्यांनी जखमींना रुग्णालयात दाखल करून वाहतूक सुरळीत केली. या अपघाताचा पुढील तपास शिरवळ पोलीस करत आहेत.
