भोर: वेळवंड येथील एका रानात चरण्यासाठी जनावरे गेली होती. सध्या पाऊस आणि वाऱ्याच्या वेगामुळे त्या ठिकाणी विद्युत वाहिनीच्या तारा तुटून पडल्या होत्या या तारांमधून जनावरांना विजेचा धक्का बसून या घटनेत तीन म्हशी दगावल्या असल्याची घटना घडली आहे.
शेतकरी तानाजी तुकाराम पांगुळ हे येथील खाजगी रानात जनावरे चारण्यासाठी बुधवार दि. २८ गेले होते. मात्र अतिवृष्टी तसेच वाऱ्याच्या जोरामुळेविद्युत वाहक तारा जनावरे चरणाऱ्या खाजगी रानात तुटून पडल्या होत्या. या विद्युत वाहकतारांचा जोरदार धक्का या तीन म्हशींना बसल्याने म्हशी जागीच ठार झाल्या. या घटनेत शेतकऱ्याचे लाखो रुपयांचे नुकसान झाले असल्याची माहिती आहे.
म्हशींना वाचवण्यासाठी शेतकरी पांगुळ यांनी ग्रामस्थ दत्ता मोरे, जगदीश बैलकर, रामभाऊ दिघे, रवींद्र पांगुळ यांच्यासह स्थानिकांनी घटनास्थळी घेत म्हशींना वाचवण्यासाठी प्रयत्न केले. दुर्दैवाने त्यांना तीन म्हशी वाचविण्यात यश आले नाही.
दोन म्हशी होत्या गाभण
विजेच्या धक्क्यात मृत पावलेल्या म्हशींमध्ये दोन म्हशी गाभण असल्याचे स्थानिकांकडून सांगण्यात आले. यामुळे शेतकऱ्याचे दीड लाखाच्या नुकसान झाले आहे. दुर्घटनाग्रस्त शेतकऱ्याला तात्काळ मदत मिळावी, अशी मागणी वेळवंड येथील शेतकरी वर्गाकडून केली जात आहे.
