पुणेः पुणे शहरात मुलींच्या छेडछाडीचे अनेक गुन्हे घडत असतानाच असाच एक प्रकार सहकारनगर भागात घडला आहे. शाळेत शिकणाऱ्या मुलीला वर्गातून बोलवून जबरदस्तीने दुचाकीवर बसवून अज्ञात शाळेच्या परिसरात असणाऱ्या मोकळ्या जागेत नेत मुलीसोबत अश्लील कृत्य केल्याचा धक्कादायक प्रकार घडला आहे. या प्रकरणी सहकारनगर पोलिसांनी दोन अल्पवयीन मुलांवर गुन्हा दाखल केला आहे. एका १४ वर्षांच्या पीडित मुलीने सहकारनगर पोलिसांत तक्रार दिली आहे.
पोलिसांनी दिलेल्या माहितीनुसार, पीडित मुलगी सहकारनगर भागातील एका शाळेत शिक्षण घेत आहे. नोव्हेंबर महिन्यापासून तिचा एक मुलगा पाठलाग करत होता. मुलीला अडवून “तू मला आवडते. माझ्यासोबत बोलली नाही, तर समाजात तुझी बदनामी करेल”, अशी धमकी त्याने दिली होती. यामुळे मुलीने पालकांना याची माहिती दिली होती. पालकांनी मुलाला व त्याच्यासोबत असलेल्या दुसऱ्या एका मुलाला समज दिली.
शनिवारी ७ डिसेंबरच्या दिवशी पिडित मुलगी शाळेत होती. तेव्हा हे दोघे शाळेत गेले. मुलीला शाळेबाहेर बोलावून तिला दुचाकीवरुन शाळेच्या परिसरातील मोकळ्या जागेत नेले. तेथे त्यांनी मुलीशी अश्लील कृत्य केले. तर दुसऱ्याने मोबाइलवर पीडित मुलीचे फोटो काढले. तसेच तिला कोणाला काही सांगितल्यास सोशल मिडीयावर फोटो व्हायरल करण्याची धमकी दिली. तसेच तुला आणि तुझ्या भावाला जिवे मारू, अशी धमकी देखील दिली. अखेर घाबरलेल्या मुलीने सहकार पोलीस ठाणे गाठत याबाबत पोलिसांकडे तक्रार दिली. त्यानुसार या प्रकरणी वरिष्ठ निरीक्षक छगन कापसे यांच्या मार्गदर्शनाखाली उपनिरीक्षक काळे तपास करत आहेत.
आधीही केली होती छेडछाड
छेडछाड काढणाऱ्या अल्पवयीन मुलांना मुलीच्या पालकांनी समज दिल्यानंतर देखील शाळकरी मुलीसोबत अश्लील कृत्य करण्यात आले. धक्कादायक बाब म्हणजे पीडित मुलीला शाळेच्या वर्गातून बोलवून जबरदस्तीने गाडीवर बसवून नेत तिच्याशी अश्लील कृत्य करण्यात करीत तिच्या भावाला जिवे मारण्याची धमकी देण्यात आली, असे तक्रार सांगण्यात आले आहे.
