राजगडः येथील रांजणे गावच्या हद्दीत रिक्षाच्या झालेल्या अपघातामध्ये मायलेकाचा दुर्देवी मृत्यू झाला असून, विवाहित मुलगी गंभीर जखमी झाल्याची घटना रविवार रात्री नऊ वाजण्याच्या सुमारास घडली. या अपघातामध्ये शालन पासलकर (वय ६५), दिपक पासलकर (वय ४५) मुळगाव गिवशी (ता. राजगड) सध्या राहणार दौंड जि. पुणे यांचा मृत्यू झाला आहे. तर कविता मरळ (वय ४०) राहणार कानंद (ता.राजगड) या गंभीर जखमी आहेत. त्यांच्यावर रुग्णालयात उपचार सुरू आहेत.
कानंद गावचे पोलीस पाटील संजय कडू यांच्याकडून मिळालेल्या माहितीनुसार, आई शालन व मुलगा दीपक हे कानंद येथे मुलीकडे गेले होते. तेथून पाबे घाट मार्गे पुण्याकडे जात असताना रांजणे गावच्या हद्दीत हा दुर्देवी अपघात घडला. या अपघाताची माहिती खानापूर येथील डॉ. स्वागत रिंडे यांनी आपत्ती व्यवस्थापनाला दिल्यानंतर रेस्क्यू टीम घटनास्थळी दाखल झाली. त्यांनी रिक्षावर पडलेले झाड कापून रस्ता वाहतुकीसाठी सुरळीत केला. आपत्ती व्यवस्थापन टीममधील सदस्य तानाजी भोसले, गणेश सपकाळ, संदीप सोळसकर, संजय चोरघे, नीलकंठ लोहकरे, व कैलास दारवटकर यांनी रस्त्यावर पडलेले झाड बाजूला केले.
सावधान…! प्रवास करताना काळजी घ्या!
स्थानिकांनी दिलेल्या माहितीनुसार, अपघात झालेल्या परिसरामध्ये जोरदार पाऊस पडल्याने रस्त्यामध्ये मोठे झाड पडले होते. पडलेल्या झाडाच्या अलीकडेच रांजणे गावच्या हद्दीत असलेल्या छोट्याशा पुलाच्या कठड्याला रिक्षा धडकून हा अपघात झाल्याची प्राथमिक माहिती मिळाली आहे. सध्या कधी उन्ह तर कधी अचानक पाऊस कोसळत आहे. यामुळे या भागातून प्रवास करताना पाऊस आहे का याची चाचपणी करुनच प्रवास करावा असे सांगितले जात आहे. सदर ठिकाणी घाट असल्याने रात्रीच्या सुमारास प्रवास करताना पाऊस वारे वादळ आदींमुळे चालकाला याचा अंदाज येत नाही. यामुळे प्रवास करताना काळजी घ्या असे आवाहन केले जात आहे.
