पुणेः राज्यात विधानसभेचे बिगूल वाजताच राजकीय पक्षांनी उमेदवारांची नावे जाहीर करण्यास सुरूवात केली आहे. सध्याच्या घडीला महाराष्ट्र नवनिर्माण सेना देखील निवडणुकीच्या रिंगणात उतरून उमेदवारांची नावे घोषित करीत आहे. शहरातील विविध जागांवर पक्षाच्या वतीने चाचपणी करण्यात येत असून, खडकवासला मतदार संघातून मनसेचे दिवंगत आमदार रमेश वांजळे यांचे पुत्र मयुरेश वांजळे यांनी उमेदवारी घोषित करण्यात आली आहे.
मनसेच्या उमेदवारांची ४५ उमेदवारांची यादी जाहीर करण्यात आली आहे. या यादीमध्ये पुण्यातील तीन उमेदवारांचा समावेश आहे. मनसेकडून हडपसर विधानसभा मतदारसंघामधून शहराध्यक्ष साईनाथ बाबर आणि कोथरुडमधून किशोर शिंदे यांना उमेदवारी जाहीर केली आहे. खडकवासला विधानसभा मतदारसंघातून राज ठाकरे यांनी गोल्डमॅन रमेश वांजळे यांच्या मुलाला संधी दिली आहे.
मी सर्वात आधी अखंड महाराष्ट्रातील मनसैनिकांचे आराध्यदैवत राज ठाकरे यांचे आभार मानतो. त्यांनी माझ्यावर हा विश्वास दाखवला, त्याला मी कधीच तडा जाऊ देणार नाही. खडकवासल्याच्या सिंहगड किल्ल्यावर यावेळी नक्कीच शिवमुद्रा फडकणार, असा विश्वास मयुरेश वांजळे यांनी उमेदवारी जाहीर झाल्यानंतर व्यक्त केला.
१३ वर्षांनी घरात उमेदवारी
रमेश वांजळे यांनी 2009 साली मनसेकडून विधानसभा निवडणूक लढवली होती. ते आमदार झाले होते. रमेश वांजळे यांची लोकप्रियता फक्त पुण्यामध्ये नाही तर राज्यभरामध्ये होती. त्यांच्या अंगावर असणाऱ्या सोन्यामुळे त्यांनी गोल्डमॅन असे म्हटले जाते. 10 जून 2011 मध्ये वांजळे यांचा हृदयविकाराच्या झटक्याने मृत्यू झाला होता. त्यानंतर तब्बल 13 वर्षांनी मनसेने पुन्हा एकदा रमेश वांजळे यांच्या कुटुंबात उमेदवारी दिली आहे.
