भोर : तालुक्यात काँग्रेस पक्षाला मोठा धक्का बसला असून, तालुक्यातील वेनवडी गावचे सामाजिक कार्यकर्ते आणि पंचायत समितीचे माजी सदस्य सतीश चव्हाण यांनी काँग्रेस पक्षाचा राजीनामा देत राष्ट्रवादी काँग्रेसमध्ये प्रवेश केला आहे. हा प्रवेश राष्ट्रवादी काँग्रेसचे प्रमुख नेते आणि महाराष्ट्र राज्याचे उपमुख्यमंत्री अजित दादा पवार यांच्या प्रमुख उपस्थितीत संपन्न झाला.
सतीश चव्हाण हे काँग्रेसचे युवा नेते संग्राम थोपटे यांचे कट्टर समर्थक मानले जातात. त्यामुळे त्यांच्या या निर्णयाने भोर तालुक्यात काँग्रेस पक्षाला मोठा फटका बसला आहे. सतीश चव्हाण यांच्या राष्ट्रवादी काँग्रेसमध्ये प्रवेशाचा भव्य स्वागत समारंभ आयोजित करण्यात आला होता. राष्ट्रवादी काँग्रेसच्या कार्यकर्त्यांनी चव्हाण यांचे जल्लोषात स्वागत केले, तर त्यांच्या पक्ष प्रवेशाने तालुक्यात राजकीय चर्चेला उधाण आले आहे.
सतीश चव्हाण यांच्या या निर्णयामुळे भोर तालुक्यातील काँग्रेसच्या कार्यकर्त्यांमध्ये अस्वस्थता असून, येत्या काळात या प्रवेशामुळे तालुक्यातील राजकीय समीकरणांवर काय परिणाम होतो, हे पाहणे महत्वाचे ठरणार आहे.
