धांगवडीतील कंपनीत ३० वर्षीय स्थानिक युवकाला विजेचा जोरदार धक्का
भोर तालुक्यातील पुणे-सातारा महामार्गावरील धांगवडी (ता.भोर ) हद्दीतील एका खासगी कंपनीत काम करणाऱ्या ३० वर्षीय तरुणाचा बुधवार (दि. १६ ) शॉक लागल्याने मृत्यू झाल्याची दुर्दैवी घटना घडली. तेजस चंद्रकांत तनपुरे रा. धांगवडी, ता. भोर असे मृत झालेल्या तरूणाचे नाव आहे. अचानक शॉक लागून तरूणाचा दुर्दैवी मृत्यू झाल्याने परिसरात मोठी हळहळ व्यक्त केली जात आहे.
स्थानिकांनी दिलेल्या माहितीनुसार तेजस तनपुरे धांगवडी गावातच असणाऱ्या धन्वी फुड्स प्रायव्हेट लिमिटेड या कोकम सरबत लिक्विड बनवणाऱ्या कंपनीत कामाला होता. बुधवार दिं.१६ दुपारी सव्वा दोन वाजण्याच्या सुमारास नेहमी प्रमाणे काम करत असताना तेजसला कंपनीतच असणाऱ्या एका मशिनला जोरदार विजेचा शॉक लागला. यांनतर कंपनीतील इतर सहकाऱ्यांनी तेजसला किकवी येथील खासगी रुग्णालयात उपचारासाठी आणले. परंतु डॉक्टरांनी उपचारापूर्वीच तेजसला मयत घोषित केले. घटनेची माहिती मिळताच राजगड पोलिसांनी घटनास्थळी धाव घेत मृतदेह ताब्यात घेऊन शवविच्छेदनासाठी भोर येथील उपजिल्हा रुग्णालयात पाठवला. कंपनीतील मशीनमध्ये तांत्रिक बिघाडामुळे हा प्रकार घडल्याची शक्यता वर्तवली जात आहे असे सांगण्यात आले आहे. या घटनेमुळे कंपनीतील कामगारांच्या सुरक्षिततेचा प्रश्न निर्माण होऊन कामगारांमध्ये भीतीचे वातावरण निर्माण झाले आहे. या घटनेनंतर कंपनीच्या मालकाविरुद्ध गुन्हा दाखल करण्याची मागणी स्थानिक नागरिकांकडून करण्यात आली आहे पुढील तपास राजगड पोलीस करत आहेत.
