भोरः शहरात कोट्यावधी रुपये खर्च करुन रस्त्यांची कामे करण्यात आली. हे रस्ते करण्यामागचे प्रमुख कारणे होते ते म्हणजे शहरातील नागरिकांना रहदारीसाठी त्रास होऊ नये. मात्र, रस्त्यांवरुन वाहतूक करणाऱ्या बेशिस्त वाहन चालक रस्त्याच्या कडेलाच वाहने पार्क करीत असल्याने वाहतूक कोंड होत असून पादचारी, नागरिक व विद्यार्थ्यांनांवर याचा नाहक त्रास सहन करण्याची वेळ आली आहे.
शहरात वाहतुकीच्या प्रमुख रस्त्यांवर वाहनांची प्रचंड प्रमाणात गर्दी मोठ्या असून, वाहने रस्त्याच्या दुतर्फा असलेल्या फूटपाथवर बेशिस्तपणे पार्किंग केली जात असल्याने वाहतूक कोंडी होत आहे. यामुळे वाहनचालकांबरोबर नागरिकांचे वाद-विवाद होत असल्याचे चित्र येथे पाहिला मिळत आहे. अनेक वेळा पायी चालणाऱ्या नागरिकांना दुचाकींचा धक्का लागतो. यामुळे नागरिकांना इजा होण्याचे देखील प्रकार घडत आहेत. अनेक वेळा वाहनचालकांची रस्त्यातच हुज्जत सुरू असते. याकडे संबंधित विभाग दुर्लक्ष करीत असल्याने नागरिक प्रशासनावर नाराजी व्यक्त करीत आहेत.
भोर नगरपालिका प्रशासनाने याकडे लक्ष देणे गरजेचे
शहरातील पदपथ हे वाहनांनी व्यापले गेल्याने विद्यार्थी तसेच नागरिकांना वाहतूक कोंडीतून रस्ता शोधत प्रवास करावा लागत आहे. याकडे भोर नगरपालिका प्रशासनाने लक्ष देण्याची मागणी केली जात आहे. तसेच रस्त्यांना येणारे वाहनतळ्याचा स्वरूप याकडे विशेष लक्ष देऊन पादचारी नागरिकांना शहरात बाजारपेठेत ये-जा करताना त्रास होणार नाही, याची दखल घेणे गरजेचे असल्याचे नागरिकांचे म्हणणे आहे.
