वाईः दोन्ही राष्ट्रवादीकडून पहिल्या यादीमधील उमेदवारांच्या नावांची घोषणा करण्यात आलेली आहे. या विधानसभा मतदार संघातून २००९ पासून आमदार असलेले मकरंद पाटील यांना राष्ट्रवादी (अजित पवार) यांनी चौथ्यांदा उमेवारीच्या रिंगणात उतरले आहे. त्यांना टफ फाईट देऊ शकेल अशा उमेदवाराची चाचपणी राष्ट्रवादी (शरद पवार) यांच्या वतीने करण्यात येत होती. अखेर या मतदार संघातून राष्ट्रवादी (शरद पवार) गटाकडून डॅा. नितीन सावंत यांच्या नावाची घोषणा करण्यात आली आहे. यामुळे या मतदार संघात टफ फाईट होणार असे बोलले जात आहे. यातच आपल्या नावाची घोषणा होताच उमेदवार डॅा. नितीन सावंत हे शरद पवार यांच्या भेटीसाठी मुंबईत दाखल झाले आहेत.
विद्यमान आमदार मकरंद पाटील यांचा वाई विधानसभा मतदारसंघात जनसंपर्क दांडगा असला तरी डॉ. नितीन सावंत यांचा विकासासाठीचा झंजावात या निवडणुकीत त्यांना मोठे आव्हान उभे करू शकतो, असे जाणकार सांगतात. डॉ. नितीन सावंत यांच्या मागे ज्येष्ठ नेते शरद पवार, खा. सुप्रिया सुळे, माजी खा. श्रीनिवास पाटील, आ. शशिकांत शिंदे, आ. रोहित पवार तसेच वाई विधानसभा मतदारसंघातील आजी-माजी पदाधिकारी आणि जनतेचे पाठबळ असणार आहे.
घड्याळ विरुद्ध तुतारी अशी लढत
सातारा जिल्ह्यातील वाई, खंडाळा आणि महाबळेश्वर या तीन तालुक्यांना एकत्रित करून हा मतदार संघ तयार झालेला आहे. सातारा जिल्ह्यातील एक महत्वाचा मतदार संघ म्हणून या मतदार संघाची ओळख आहे. राष्ट्रवादी काँग्रेस पक्ष अजित पवार गटाचे आमदार मकरंद पाटील हे येथील विद्यामान आमदार आहेत. या आधीच्या निवडणुकीत मकरंद पाटील यांना विरोध केलेले मदन भोसलेही सध्या भारतीय जनता पक्षामध्ये आहेत, दुसरीकडे राष्ट्रवादीमधील फुटीनंतर मकरंद पाटील यांनी अजित पवारांसोबत राहण्याचा निर्णय घेतला. त्यामुळे विधानसभेला मकरंद पाटील यांच्यासमोर कोणाचे आव्हान असणार? याबाबत चर्चा सुरु होत्या. मात्र, आता वाईतून डॉ. नितीन सावंत यांना उमेदवारी जाहीर करण्यात आल्याने घड्याळ विरुद्ध तुतारी अशी लढत पहायला मिळणार आहे.
२००९ पासून मकरंद पाटील यांचे वर्चस्व
२००९, २०१४ आणि २०१९ असे सलग तीन वेळा मकरंद पाटील यांंनी या मतदार संघाचे नेतृत्व विधानसभेत केले आहे. २०१४ च्या निवडणुकीत वाई विधानसभा मतदार संघामध्ये राष्ट्रवादी काँग्रेसकडून मकरंद पाटील आणि काँग्रेसचे मदनराव भोसले यांच्यामध्ये लढत झाली होती. मकरंद पाटील यांना १,०१,२१८ मदनराव भोसले यांना ६२,५१६ मते मिळाली होती. त्यानंतर झालेल्या २०१९ च्या निवडणुकीत मदन भोसले यांनी भाजपमध्ये प्रवेश करत निवडणूक लढवली. मात्र, त्यांना पुन्हा पराभव स्विकारावा लागला होता. या निवडणुकीत मकरंद पाटील यांना 1 लाख 30 हजार 486 मते तर विरोधी उमेदवार मदन भोसले यांना 86 हजार 839 मते मिळाली होती. आता या निवडणुकीत पाटील हे आपले वर्चस्व कायम राखतील की सावंत त्यांचे वर्चस्व भेदतील हे पाहणे महत्वाचे असणार आहे.
