बिबट्या करत आहे पाळीव प्राणी फस्त
भोर तालुक्यातील पश्चिमेकडील वेळवंड खोऱ्यातील पसुरे येथील कुंबळजाईनगर मध्ये बिबट्याचे दर्शन रात्री उशिरा झाल्याने नागरिकांमध्ये भीतीचे वातावरण तयार झाले आहे.
मागील काही दिवसांपासून पसुरे व आजूबाजूच्या परिसरात बिबट्याचा वावर असून अनेक पाळीव प्राणी, जनावरे बिबट्याने फस्त केल्याचे नागरिकांकडून सांगण्यात येत आहे . अशातच बुधवारी रात्री कुंबळजाईनगर मधील रहिवाशी भरत नाथ्याबा धुमाळ यांच्या दारासमोर रात्री उशिरा बिबट्या वावरत असताना दिसला. त्यांनी तात्काळ गावातील नागरिकांना तसेच सरपंच पंकज धुमाळ यांना कळविले असून नागरिकांमध्ये भीतीचे वातावरण तयार झाले आहे. वनविभागाने तात्काळ बिबट्याचा बंदोबस्त करावा अशी मागणी येथील ग्रामस्थांकडून करण्यात आली आहे.
“वनविभागाशी संपर्क केला असून वनविभागाने तात्काळ बिबट्या जेरबंर करण्यासाठी पिंजरा लावावा. नागरिकांनीही घाबरून न जाता सतर्क रहावे रात्री अपरात्री एकट्याने बाहेर न पडता समूहाने प्रवास करावा. बिबट्या पुन्हा निदर्शनास आल्यात तात्काळ संपर्क साधावा”.- पंकज उर्फ प्रविण धुमाळ -विद्यमान सरपंच पसुरे (ता.भोर)
“बिबट्या हा प्राणी एका रात्रीत 18 ते 20 किलोमीटर पर्यंत वावरत असतो. तो कधीच एका जागेवर राहत नाही. वरिष्ठ पातळीवर बिबट्याचा पिंजरा लावण्यासाठी हालचाली सुरू असुन नागरिकांनी घाबरून न जाता सतर्क रहावे. लहान मुले, महिला ,वयोवृद्ध नागरिक यांनी रात्री एकटे बाहेर पडू नये. तसेच रात्रीच्या वेळी बाहेर झोपू नये. पाळीव प्राणी, जनावरे ,बंदिस्त गोठ्यात बांधण्यात यावीत. रात्रीच्या वेळी हातामध्ये काठी व बॅटरी घेऊन बाहेर पडावे. अफवांवर विश्वास ठेवू नये.बिबट्याबाबत वनविभागामार्फत जनजागृती करण्यात येणार आहे”. के.पी.देठे – वनरक्षक पसुरे विभाग (ता.भोर)
