नसरापूर : भोर तालुक्यातील शिवरे गावामध्ये ‘विकसित कृषी संकल्प अभियान’ अंतर्गत आयोजित विशेष कार्यक्रमात खासदार सुप्रिया सुळे यांच्या हस्ते शेतकऱ्यांना सोयाबीनच्या उन्नत बियाण्यांचे तसेच कीडनाशक व औषधांचे वाटप करण्यात आले. बारामती कृषी विज्ञान केंद्राच्या सहकार्याने या उपक्रमाचे आयोजन करण्यात आले होते.
कार्यक्रमात उपस्थित शेतकऱ्यांना आधुनिक व वैज्ञानिक शेती पद्धतींबाबत सखोल मार्गदर्शन देण्यात आले. राहुरी कृषी विद्यापीठाचे जेष्ठ निवृत्त कडधान्य शास्त्रज्ञ डॉ. बाळकृष्ण जमदग्नी यांनी सोयाबीन पिकाचे अधिक उत्पादन घेण्यासाठी आवश्यक असणाऱ्या तांत्रिक बाबी स्पष्ट केल्या. त्यांनी पेरणी, कीड व रोग व्यवस्थापन अशा विविध टप्प्यांवर शेतकऱ्यांना उपयुक्त माहिती दिली.
या उपक्रमाअंतर्गत शिवरे गावातील ९० आणि रांजे गावातील १२ शेतकऱ्यांना सोयाबीनच्या उन्नत वाणांचे बियाणे वितरित करण्यात आले. त्यासोबतच आवश्यक कीडनाशके व औषधे यांचाही पुरवठा करण्यात आला.
कार्यक्रमास प्रमुख पाहुणे म्हणून डॉ. समी रेड्डी (संचालक, राष्ट्रीय अजैविक ताण व्यवस्थापन संस्था, माळेगाव), डॉ. धीरज शिंदे (प्रमुख व वनिष्ठ शास्त्रज्ञ, कृषी विज्ञान केंद्र, बारामती), संतोष करंजे व संतोष गोडसे (विषयतज्ज्ञ), डॉ. एस.एम. पवार (ऊस शास्त्रज्ञ) यांनी उपस्थिती दर्शवली.
स्थानिक पातळीवर शिवरेच्या सरपंच अमृता गायकवाड, तालुका कृषी अधिकारी शरद धर्माधिकारीयांच्यासह केळवडे, कांजळे आणि शिवरे परिसरातील शेकडो शेतकरी मोठ्या संख्येने उपस्थित होते. कार्यक्रमाचे सूत्रसंचालन संतोष करंजे यांनी केले तर आभार प्रदर्शन ग्रामपंचायत अधिकारी भूषण पुरोहित यांनी केले.
