नसरापूर | प्रतिनिधी : दि. ७ जून रोजी नसरापूर येथे भोर तालुक्यातील शिवसेना पदाधिकारी व कार्यकर्त्यांची महत्त्वपूर्ण आढावा बैठक शिवसेना तालुका संघटक कुलदीप कोंडे यांच्या पुढाकाराने उत्साही वातावरणात पार पडली. या बैठकीला तालुक्यातील सर्व विभागांतील प्रमुख पदाधिकारी आणि निष्ठावान शिवसैनिक मोठ्या संख्येने उपस्थित होते.
बैठकीत आगामी निवडणुकांसाठी कार्यकर्त्यांना सज्ज राहण्याचे आणि संघटनात्मक ताकद वाढवण्याचे स्पष्ट संकेत देण्यात आले. कुलदीप कोंडे यांनी पक्षाचे धोरण, सामाजिक बांधिलकी आणि गावागावात संघटन मजबूत करण्याचे महत्त्व अधोरेखित केले.
या प्रसंगी सर्वांनी एकमुखाने मुख्यमंत्री एकनाथ शिंदे, हिंदूहृदयसम्राट बाळासाहेब ठाकरे आणि धर्मवीर आनंद दिघे यांच्या विचारांवर निष्ठा ठेवत कार्य करण्याचा निर्धार व्यक्त केला. पक्षाच्या तळागाळातील कार्याचा विस्तार करण्यासाठी स्थानिक प्रश्न, जनतेच्या अडचणी आणि गरजांवर केंद्रित राहण्याचे आवाहन करण्यात आले.
नव्या कार्यकर्त्यांना पक्षाशी जोडण्यासाठी युवकांमध्ये जनजागृती करणे, सामाजिक उपक्रम हाती घेणे, आणि गावोगावी लोकहिताचे कार्य करणे यावर विशेष भर देण्यात आला. प्रत्येक शिवसैनिकाने सामाजिक जबाबदारी स्वीकारावी आणि पक्षाचे विचार समाजात पोहोचवावेत, अशी अपेक्षा व्यक्त करण्यात आली.
शेवटी, “शिवसेना ही फक्त राजकीय संघटना नसून समाज परिवर्तनाची ताकद आहे,” या जाणिवेने प्रेरित होत सर्वांनी एकजुटीने कार्य करण्याचा निर्धार केला. या बैठकीमुळे शिवसैनिकांमध्ये नवचैतन्य संचारले असून, आगामी काळात भोर तालुक्यात शिवसेनेचा प्रभाव अधिक बळकट होईल, असा विश्वास व्यक्त केला जात आहे.
