पुणे: राष्ट्रवादी काँग्रेसचे माजी नगरसेवक वनराज आंदेकर यांच्यावर काल रात्री साडेआठ वाजण्याच्या सुमारास नाना पेठेतील एका ठिकाणी दहा ते बारा जणांच्या टोळक्याने त्यांच्यावर पिस्तूलातून गोळ्या झाडून तसेच कोयत्याने वार करुन हल्ला चढविला होता. या घटनेनंतर आंदेकर यांना केईएम रुग्णालयात दाखल करण्यात आले. परंतु, उपचारापूर्वी त्यांना डॅाक्टरांनी मृत घोषित केले. आता या घटनेत धक्कादायक माहिती समोर आली आहे. या हल्ल्यामागे दुसरे तिसरे कोणी नसून वनराज आंदेकर यांची सख्खी बहिण आणि मेव्हणा असल्याची माहिती मिळत आहे.
एका भांडणामध्ये आंदेकर यांनी मध्यस्थी करून भांडणे मिटवल्याच्या तसेच दुकानाचे अतिक्रमण पाडायला लावल्याचा रागातून त्यांच्या सख्या बहिणीने वनराज यांना ‘तुला पोरं बोलवून ठोकतेच’ अशी धमकी दिली होती. त्यानंतर दहा ते बारा जणांनी वनराज यांच्यावर हल्ला केला. त्यातच त्यांचा मृत्यू झाला. या घटनेमुळे पुण्यातील गुन्हेगारी विश्वासह राजकीय वर्तुळात मोठी खळबळ उडाली असून, सख्ख्या बहिणीनेच भावाचा काटा काढल्यामुळे पोलीस देखील चक्रावून गेले आहेत.
याप्रकरणी संजीवनी जयंत कोमकर (रा. ३०९, नाना पेठ) जयंत लक्ष्मण कोमकर, प्रकाश जयंत कोमकर, गणेश लक्ष्मण कोमकर, सोमनाथ सयाजी गायकवाड (रा. आंबेगाव पठार, धनकवडी) अनिकेत दूधभाते (रा. आंबेगाव पठार, धनकवडी), तुषार उर्फ आबा कदम (रा. धनकवडी) सागर पवार (रा. धनकवडी), पवन करताल (रा. मंगळवार पेठ) सॅम ऊर्फ समीर काळे यांच्यासह आणखी पाच जणांवर गुन्हा दाखल करण्यात आला आहे. याप्रकरणी सूर्यकांत ऊर्फ बंडू राणूजी आंदेकर (वय ६८, रा. सोनाई दादा निवास, नाना पेठ) यांनी फिर्याद दिली आहे.
एका जुन्या भांडणात मयत वनराज यांनी मधस्थी केली होती
मयत वनराज हे सुर्यकांन आंदेकर यांचे पुत्र होते. संजीवनी ही त्यांची मुलगी आहे. जयंत कोमकर हा जावई आहे. आरोपींचे १ सप्टेंबर रोजी आकाश सुरेश परदेशी यांच्याशी वाद झाले होते. आरोपी तक्रार देण्याकरीता समर्थ पोलीस ठाण्यात गेले होते. त्यावेळी शिवम आंदेकर व वनराज आंदेकर हे देखील पोलीस ठाण्यात गेले. तेथे आरोपी संजीवनी व जयंत यांनी आकाशला मारहाण केली. हे भांडण शिवम आंदेकर यांनी सोडवले. त्यावेळी संजीवनी हिने वनराज यांना ‘वनराज… आम्ही तुला जगु देणार नाही. तु आमच्यामधे आला आहेस. तु आमचे दुकान पाडण्यास सांगून आमच्या पोटावर पाय देतोस काय? तुला आज पोर बोलावुन ठोकतेच.’ अशी धमकी दिली होती.
मयत वनराज आंदेकर हे पुणे महापालिकेत नगरसेवक असताना वनराज यांनी सांगितल्यामुळेच आरोपींच्या दुकानावर अतिक्रमण विभागाने कारवाई केल्याचा आरोपींना संशय होता. यातूनच आंदेकर यांची हत्या करण्याचा कट रचण्यात आला. अशी माहिती मिळत आहे.
