पुणेः प्रतिनिधी वर्षा काळे
भारताचे नंदनवन असलेल्या काश्मीर खोऱ्यात यंदाही सलग दुसऱ्या वर्षी सार्वजनिक गणशोत्सव साजरा करण्यात येणार आहे. विशेष म्हणजे यावर्षी आता तीन ठिकाणी हा उत्सव साजरा होणार असून, या मंडळांना पुण्यातील मानाच्या गणपतीच्या मूर्ती सुपूर्द करण्यात आल्या आहे.
पुणे शहरातील गणेश मंडळांमध्ये पुणे येथील कसबा गणपती, तांबडी जोगेश्वरी, गुरुजी तालीम, तुळशीबाग गणपती, केसरी वाडा हे मानाचे गणपती तसेच श्रीमंत भाऊसाहेब रंगारी गणपती आणि अखिल मंडई मंडळ या मंडळांचा समावेश आहे. श्रीमंत भाऊसाहेब रंगारी गणपती ट्रस्टचे उत्सवप्रमुख आणि विश्वस्त पुनीत बालन यांनी पुण्यातून मुहर्तवेढ रोवला गेलेला सार्वजनिक गणेशोत्सव साता समुद्रपार पोहचला आहे.
जगभरात अनेक ठिकाणी गणेशोत्सव मोठ्या उत्सहामध्ये साजरा करण्यात येतो. होतो. मात्र, भारताचा अविभाज्य भाग असलेल्या काश्मीर खोऱ्यात मात्र गेले ३४ वर्ष गणेशोत्सव साजरा केला जात नव्हता, ही बाब लक्षात घेऊन काश्मीरमध्ये पुन्हा गणेशोत्सव साजरा करण्यासाठी युवा उद्योजक पुनीत बालन यांनी पुढाकार घेतला आहे. पुण्यातील मानाच्या गणपती मंडळांनी एकत्र येत त्यासाठी पाऊल उचलले आणि गतवर्षी कश्मीरमधील लाल चौकात गणपती मंदिरात दीड दिवसांचा गणेश उत्सव मोठ्या जल्लोषात साजरा करण्यात आला होता.
आता यावर्षीही कुपवाडा व अनंतनाग या आणखी दोन ठिकाणी पाच दिवसांचा गणेशोत्सव साजरा करण्यात येणार आहे. पहिल्या वर्षी मानाचा पहिला गणपती कसबा गणपतीची मूर्ती बसविण्यात आली होती. आता यावर्षी अनुक्रमे मानाचा दुसरा गणपती तांबडी जोगेश्वरी, मानाचा तिसरा गणपती गुरुजी तालीम व मानाचा चौथा गणपती तुळशीबाग यांच्या मूर्ती त्यासाठी सुपूर्त केल्या आहेत.
