नसरापूर : पुणे-सातारा महामार्गालगत असलेल्या खेड शिवापुर परिसरात एका इमारतीत सुरू असलेल्या तीन पत्तीच्या जुगार अड्ड्यावर राजगड पोलिसांनी छापा टाकत १७ जणांविरोधात कारवाई केली. या कारवाईत २८ हजार ३०० रुपयांची रोख रक्कम आणि २०८ पत्त्यांचे कॅट जप्त करण्यात आले असून सर्व आरोपींविरुद्ध महाराष्ट्र जुगार प्रतिबंधक कायद्यान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, राजगड पोलिस ठाण्याचे पोलिस निरीक्षक राजेश गवळी यांना खेड शिवापुरमधील हॉटेल गार्गी शेजारील इमारतीच्या पहिल्या व दुसऱ्या मजल्यावर तीन पत्तीचा जुगार सुरू असल्याची गोपनीय माहिती मिळाली होती. त्यानुसार शुक्रवारी (दि. २० जून) सायंकाळी ५ वाजण्याच्या सुमारास पोलिसांचे पथक घटनास्थळी धाड टाकून १७ जणांना रंगेहाथ पकडले. मकरंद दत्ता मेदने (२९, सिंहगड रोड), अमित उर्फ गोपळ चिकुदरे (३९, बिबवेवाडी), वैभव थोपटे (२७, माणिक बाग), ज्ञानेश्वर बालपांडे (३२, धायरी फाटा), विठ्ठल दारवटकर (२९, पर्वती), विनायक चित्ते (५२, गुरुवार पेठ), गोकुळ धोबी (४६, खेड शिवापुर), अनिल माने (४१, हडपसर), फारूक शेख (३९, खेड शिवापुर), लखण बसटे (३४, सुखसागर नगर), राजकुमार शिखरे (४८, खेड शिवापुर), सलीम शहा (३०, खेड शिवापुर), शब्बीर शेख (४४, खेड शिवापुर), योगेश मिस्त्रा (४२, हडपसर), राकेश राउत (३२, वडगाव बु.), पंकज गायकवाड (३३, वडगाव बु.) या १७ आरोपींविरुद्ध महाराष्ट्र जुगार प्रतिबंधक कायद्यान्वये गुन्हा दाखल करण्यात आला आहे.
या सर्वांच्या अंगझडतीतून रोख रक्कम व जुगारासाठी वापरलेले पत्ते जप्त करण्यात आले. सदर प्रकरणी पोलीस शिपाई अक्षय सुभाष नलावडे यांनी फिर्याद दिली असून अधिक तपास पोलीस उपनिरीक्षक अजित पाटील करत आहेत.
