नसरापूर : शिवसेनेच्या भोर तालुक्याच्या उपजिल्हाप्रमुखपदी गणेश शरदराव निगडे यांची पुन्हा एकदा नियुक्ती करण्यात आली असून, त्यांचा कार्यकाळ एक वर्षाचा असेल. दिनांक ३ जून २०२५ रोजी शिवसेनेच्या मध्यवर्ती कार्यालयामार्फत अधिकृतरित्या प्रसिद्ध करण्यात आलेल्या नियुक्तीपत्रात ही माहिती देण्यात आली आहे.
गणेश निगडे हे मागील काही वर्षांपासून भोर तालुक्यात शिवसेनेच्या माध्यमातून सातत्याने कार्यरत आहेत. एमआयडीसीसारख्या औद्योगिक विकास प्रकल्पासाठी केलेले पाठपुरावा, शिवापूर टोलनाका सुसूत्रीकरण, तसेच भोर एस.टी. डेपोच्या विकासासाठी राबवलेली धोरणात्मक भूमिका या त्यांच्या कार्याचा भाग ठरला आहे. याशिवाय, ग्रामीण भागातील नवीन विनंती थांबे, तसेच खेड्यापाड्यात नव्या एस.टी. बस गाड्यांची मागणी व पूर्तता यासाठीही त्यांनी राज्य परिवहन विभागाकडे पाठपुरावा केला आहे.
त्यांच्या या सकारात्मक आणि जनहितकारी कामगिरीची दखल घेऊनच उपमुख्यमंत्री एकनाथ शिंदे यांच्या मार्गदर्शनाखाली व आदेशानुसार ही फेरनियुक्ती करण्यात आल्याचे सांगण्यात येते. शिवसेना सचिव संजय मोरे यांच्या स्वाक्षरीने ही नियुक्ती अधिकृत करण्यात आली असून, यामध्ये “शिवसेनेचा विस्तार आणि हिंदुत्व प्रचार” या उद्दिष्टांसाठी निगडे हे सक्रीय राहतील, असे स्पष्ट करण्यात आले आहे.
गणेश निगडे यांच्या निष्ठावान कार्यपद्धतीवर पक्षश्रेष्ठींचा विश्वास असून, भोर तालुक्यात शिवसेनेच्या बळकटीसाठी ते महत्त्वाची भूमिका बजावतील, असा विश्वास पक्षाकडून व्यक्त करण्यात आला आहे.या फेरनियुक्तीमुळे कार्यकर्त्यांमध्ये उत्साहाचे वातावरण असून, भोर तालुक्यात पक्ष संघटन अधिक बळकट होणार असल्याची भावना व्यक्त केली जात आहे.
