आमदारकीसाठी शिवसेना उबाठा पक्षाकडून शंकर मांडेकर इच्छुक उमेदवार
भोर तालुक्यात विधानसभेचे वारे वाहू लागले असुन शिवसेना उबाठा पक्षाकडून मोर्चे बांधणी सुरू झाली आहे.शिवसेना उबाठा पक्षाचे भोर वेल्हा मुळशीचे जिल्हा प्रमुख शंकर मांडेकर हे उद्यापासून शिवतीर्थ चौपाटी येथील शिवाजी महाराजांच्या पुतळ्याला हार घालून रायरेश्वरावरील शंभू महादेवाचे दर्शन घेत भोरला गावोगावी भगवा सप्ताह साजरा करत, शिवसंवाद दौ-यातुन तालुक्यातील नागरिकांशी सुसंवाद साधणार असल्याचे पुणे जिल्हा उपजिल्हा प्रमुख संतोष मोहोळ यांनी सांगितले.
या रायरेश्वरावरील शंभू महादेवाचे दर्शन घेतल्यानंतर मांडेकर या परिसरातील तसेच आजूबाजूच्या सर्व गावांमध्ये जाऊन नागरिकांच्या समस्या,अडी-अडचणी, प्रश्न जाणून घेऊन त्यांच्याशी सुसंवाद साधणार आहेत. तालुक्यातील सर्व गावांमध्ये शिवसेना उबाठा पक्षाची सभासद नोंदणी,शाखा व्यवस्थापण, शाखापदाधिकारी पद वाटप अशा सर्व प्रकारची कामे या दौऱ्यातुन पक्ष संघटना बळकट करण्यासाठी शंकर मांडेकर करणार आहेत असे तालुका प्रमुख हनुमंत कंक यांनी सांगितले. यावेळी शंकर मांडेकर याचे बंधू निलेश मांडेकर, शिवसेना (उबाठा) उपजिल्हा प्रमुख संतोष मोहोळ, तालुका प्रमुख हनुमंत कंक व कार्यकर्ते उपस्थित होते.
आम्हाला भोरच्या जागेवर विधानसभेचे तिकीट भेटल्यावर आम्ही नक्कीच यावेळी बाजी मारून परिवर्तन घडवू परंतु पक्षश्रेष्ठींचे व मातोश्रीवरून आलेले आदेश आम्ही पाळणार असल्याचेही उपजिल्हा प्रमुख मोहोळ यांनी स्पष्ट केले.