भोर प्रतिनिधी – कुंदन झांजले
भोर आगाराची एमएच ०६ एस ८२८९ ही एसटी बस पावसामुळे साईड पट्टीवरून घसरून गटारात पलटी झाल्याची घटना बुधवार दि.९ रोजी सायंकाळी पाच वाजण्याच्या दरम्यान ही घटना घडली. बसमध्ये आठ प्रवासी होते त्यामध्ये काही शाळकरी मुली जखमी झाल्याचे स्थानिकांकडून सांगण्यात आले आहे.
मिळालेल्या माहितीनुसार सदरची एसटी ही भोरकडे निघाली होती . महुडे येथील शाळेतून सुटलेल्या ६ मुली व दोन इतर प्रवासी प्रवास करीत होते .महूडे खुर्द आणि महूडे बुद्रुक येथील खुडेवस्ती जवळील विहिरीच्या जवळ अरुंद रस्त्यावर समोरून येणाऱ्या वाहनाला साईट देताना चालकाचा ताबा सुटल्याने ही एसटी साईटपट्टीवरून पलटी झाली. यावेळी बसमधील एक मुलगी जखमी झाली असून तर इतर पाच मुली तर बस चालक व वाहक सुखरूप असल्याचे सांगण्यात आले. जखमींना भोर येथील उपजिल्हा रुग्णालय दाखल केले आहे मात्र एसटी बसचे मोठ्या प्रमाणावर नुकसान झाले आहे.मागील वर्षीही पावसाळा सुरू झाल्यानंतर या अपघाताप्रमाणेच रस्ता अरुंद असल्याने एसटी बस पलटी झाली होती.यंदाही त्याच प्रकारचा अपघात झाला असल्याने शासनाने रस्त्यांचे रुंदीकरण करावे, साईट पट्ट्या मोठ्या भरावाच्या कराव्यात अशी मागणी या भागातील नागरिकांकडून होत आहे. घटनास्थळी भोर एसटी आगाराचे अधिकारी तात्काळ पोहोचून पुढील कार्यवाही सुरू केली.
