पिंपरीः पिंपरी चिंचवडमध्ये माणुसकीला हादरवून सोडणारा प्रकार समोर आला आहे. वय वर्ष ८५ या वयोवृद्ध महिलेवर २३ वर्षीय नराधमाने बलात्कार केल्याची धक्कादायक घटना उघडकीस आली आहे. या नंदनीय प्रकारामुळे नागरिकांकडून रोष व्यक्त करण्यात येत आहे. या प्रकरणी पोलिसांनी ओम जयचंद्र पुरी वय २३ या नराधमाला बेड्या ठोकल्या आहेत.
जिन्याखाली जबरदस्तीने वृद्ध महिलेवर केला बलात्कार
पोलिसांनी दिलेल्या माहितीनुसार, रविवारी सायंकाळी साडेसहाच्या वाजण्याच्या सुमारास पीडित ८५ वर्षीय वृद्ध महिला त्यांच्या फ्लॅटच्या समोरील मोकळ्या जागेत शतपावली करत होत्या. यावेळी आरोपी ओम पुरी हा अचानक त्यांच्या पाठीमागे येवून त्याने वृद्ध महिलेचे तोंड दाबून धरले. त्यानंतर त्यांना जिन्यातून फरपटत नेऊन जिन्याच्या मोकळ्या जागेत जबरदस्ती करून बलात्कार केला. यानंतर वृद्ध महिलेला जिवे मारण्याचा प्रयत्न देखील करण्यात आला. या घटनेनंतर आरोपी तिथून फरार झाला.
घटना ऐकून मुलगी झाली स्तब्ध
वृद्ध महिला या घरात बराच वेळ झाला तरी आल्या नसल्याने घरातील व्यक्तीने त्यांची शोधाशोध केली. जिन्याच्या खाली असलेल्या मोकळ्या जागेत पीडित वृद्ध असलेल्या दिसल्या. त्यानंतर घडलेली संपूर्ण घटना त्यांनी आपल्या मुलीला सांगितली. हा संपूर्ण प्रकार ऐकल्यानंतर काही वेळ त्यांची मुलगी देखील स्तब्ध राहिली. यानंतर महिलेला तातडीने रुग्णालयात दाखल करण्यात आले. पोलिसांनी अवघ्या तासातच आरोपीच्या मुसक्या आवळल्या.
