भोरः जिल्हा परिषद प्राथमिक शाळा गोरड म्हसवली येथे पोलीस पाटील सुरेश प्रकाश चव्हाण पाटील, विभागीय अध्यक्ष भोर-वेल्हा-मुळशी तालुका पोलीस पाटील संघ यांच्या वतीने पहिली ते सातवीच्या प्रत्येक विद्यार्थ्यांना एक झाड आणि कुंडी देऊन वेगळ्या प्रकारे स्वातंत्र्य दिन साजरा करण्यात आला. तसेच विद्यार्थ्यांमध्ये स्पर्धा लावण्यात आलेली आहे की, पुढच्या 15 ऑगस्टपर्यंत ज्यांचे झाड हे चांगले असेल, त्यांना एक ते तीन नंबर पर्यंतची बक्षीस दिली जाणार आहेत.
कार्यक्रमाच्या अध्यक्ष सुरेश चव्हाण पाटील होते. तसेच कार्यक्रमाचे प्रस्ताविक मुख्याध्यापिका जयश्री शिवतरे यांनी केले, तर आभार अजित वाडकर सर यांनी मानले. कार्यक्रमासाठी विशेष सहकार्य मिश्रा मॅडम यांचे लाभले. कार्यक्रमाला सरपंच जगन ओंबळे, तंटामुक्ती अध्यक्ष भाऊसाहेब गोरड तसेच ग्रामस्थ मोठ्या संख्येने उपस्थित होते. या शाळेत राबविण्यात आलेल्या अनोख्या उपक्रमाचे सर्वत्र कौतुक केले जात आहे.
