खेडशिवापूर (पुणे) : येथे भोर-हवेली महामार्ग पत्रकार संघाच्या चौथ्या वर्धापन दिनानिमित्त आयोजित कार्यक्रम उत्साहात संपन्न झाला. या कार्यक्रमाला विविध क्षेत्रांतील मान्यवरांची उपस्थिती लाभली होती. कार्यक्रमाचे प्रमुख अतिथी म्हणून आमदार भीमराव तापकीर उपस्थित होते.
यावेळी बोलताना आमदार तापकीर म्हणाले की, “भोर-हवेली महामार्ग पत्रकार संघ सामाजिक बांधिलकी जपत पत्रकारितेबरोबरच जनजागृती, शैक्षणिक मदत आणि समाजोपयोगी उपक्रम राबवत आहे, ही अत्यंत कौतुकास्पद बाब आहे. पत्रकारांनी समाजातील प्रश्नांना वाचा फोडत लोकशिक्षणाचे कार्य सातत्याने करावे.” त्यांच्या या वक्तव्याला उपस्थितांकडून उत्स्फूर्त दाद मिळाली.
वर्धापन दिनानिमित्त आयोजित कार्यक्रमात ‘भोंदूगिरीचे स्वरूप : ढोंग आणि अंधश्रद्धा’ या विषयावर विशेष व्याख्यानाचे आयोजन करण्यात आले होते. अंधश्रद्धा निर्मूलन समितीचे सदस्य विशाल विमल यांनी उपस्थितांना मार्गदर्शन केले. त्यांनी समाजात वाढणाऱ्या अंधश्रद्धा, ढोंग आणि भोंदूगिरीच्या प्रकारांवर परखड भाष्य करत नागरिकांनी वैज्ञानिक व विवेकवादी दृष्टिकोन स्वीकारण्याचे आवाहन केले.
या कार्यक्रमात विविध क्षेत्रांत उल्लेखनीय कार्य करणाऱ्या व्यक्तींचा सन्मान करण्यात आला. ‘शिवगंगा भूषण’ पुरस्काराने उद्योजक राजेंद्र पवार व उमेश देशपांडे यांना गौरविण्यात आले. तसेच आदर्श समाजसेवक पुरस्कार योगेश मांगले व ज्ञानेश्वर चौधरी, आदर्श समाजसेविका पुरस्कार किर्ती कुंटे व पल्लवी दिघे यांना प्रदान करण्यात आला.
याशिवाय आदर्श प्रशासकीय सेवा पुरस्कार अमोल शेडगे, संभाजी धनवाडे व अभय निकम, आदर्श आरोग्य दूत पुरस्कार श्रीकांत चांदगे, तसेच आदर्श क्रीडा खेळाडू व प्रशिक्षक पुरस्कार शिवम धोंडे व लक्ष्मण सनस यांना देऊन गौरविण्यात आले.
कार्यक्रमात सामाजिक बांधिलकी जपत विविध गरजू विद्यार्थ्यांना मदतवाटपही करण्यात आले. पत्रकार संघाच्या या उपक्रमाचे उपस्थित मान्यवरांनी विशेष कौतुक केले.
