भोर |भोर उपविभागातील कथित अवैध धंदे आणि त्यांच्या पाठीमागे असलेल्या आर्थिक साखळीबाबत गंभीर प्रश्न उपस्थित होत आहेत. भोर, राजगड, सासवड आणि जेजुरी या चार पोलीस ठाण्यांच्या हद्दीत जुगार, मटका, अवैध दारूविक्रीसह अन्य बेकायदेशीर व्यवसाय सुरू असल्याचे आरोप केले जात आहेत. या व्यवसायांमागे नेमके कोणाचे हितसंबंध आहेत, कथित आर्थिक व्यवहार कोणामार्फत होतात आणि या साखळीतील पुढील दुवे कोणते, याची निष्पक्ष चौकशी करण्याची मागणी पुढे येत आहे.
महिन्याला लाखोंच्या कथित व्यवहारांची चर्चा!
उपविभागीय पोलीस कार्यालयाशी संबंधित एका कर्मचाऱ्याच्या कथित आर्थिक व्यवहारांबाबत परिसरात चर्चा असल्याचे सांगितले जात आहे. संबंधित कर्मचारी स्विफ्ट डिझायर कारमधून विविध ठिकाणी वारंवार जात असल्याची चर्चा असून, या फेऱ्यांचा नेमका उद्देश काय, याची चौकशी होणार का, असा सवाल उपस्थित होत आहे.
संबंधित कर्मचाऱ्याला दरमहा दोन ते तीन लाख रुपये कमिशन मिळत असल्याचा आरोप केला जात आहे. तसेच वरिष्ठ अधिकाऱ्यांच्या नावाने नऊ ते दहा लाख रुपयांपर्यंत रक्कम दिली जात असल्याचीही चर्चा आहे. मात्र, या दाव्यांना अद्याप स्वतंत्र पुराव्यांची पुष्टी मिळालेली नाही. त्यामुळे या आरोपांची अधिकृत पडताळणी आवश्यक आहे.
चार पोलीस ठाण्यांच्या हद्दीत कथित कलेक्शन?
चारही पोलीस ठाण्यांच्या हद्दीतून दरमहा सुमारे दहा लाख रुपयांचे कथित कलेक्शन होत असल्याचा दावा केला जात आहे. हा पैसा कोण गोळा करतो, त्याचे वितरण कोणाकडे होते आणि या व्यवहारांमध्ये कोणाचा सहभाग आहे, हे तपासातून स्पष्ट होणे गरजेचे आहे.
३५ लाख रुपये गुंठ्याच्या प्लॉटची चर्चा!
संबंधित कर्मचाऱ्याच्या नावावर किंवा संबंधित व्यक्तींशी निगडित मालमत्तांबाबतही चर्चा सुरू आहे. तालुक्यात विविध ठिकाणी मालमत्ता असल्याचे दावे केले जात असून, ३५ लाख रुपये प्रति गुंठा किमतीच्या प्लॉटचा मुद्दाही चर्चेत आहे. या मालमत्तेची मालकी, खरेदीची कागदपत्रे आणि निधीचा स्रोत यांची कायदेशीर चौकशी झाल्यास वस्तुस्थिती स्पष्ट होऊ शकते.
वरिष्ठ अधिकारी चौकशी करणार का?
या कथित आर्थिक साखळीची स्वतंत्र चौकशी होणार का? संबंधित कर्मचाऱ्याची बाजू जाणून घेतली जाणार का? चारही पोलीस ठाण्यांच्या हद्दीत अवैध धंद्यांविरोधात विशेष मोहीम राबवली जाणार का? हे प्रश्न अनुत्तरित आहेत.
क्रमशः
