पुणे: मेडिकल तपासणीवरून पोलीस स्टेशनमध्ये परत घेऊन जात असताना बेड्यांमधून हात सोडवून मोक्कोच्या गुन्हात अटकेत असलेल्या आरोपीने पलायन केल्याची घटना गुंजन टॅाकीज चौकात सोमवारी रात्री घडली. यामुळे ताब्यातून अशा प्रकारे आरोपीने पलायन केल्याने पोलीस प्रशासनात खळबळ उडाली आहे. निखिल मधुकर कांबळे (२२, रा. लक्ष्मीनगर, येरवडा) असे पळून गेलेल्या आरोपीचे नाव असून, येरवडा पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, कांबळे हा रिकार्डवरील गुन्हेगार असून येरवडा पोलिसांना त्याला व त्याच्या साथीदारांना काही महिन्यांपूर्वी महाराष्ट्र संघटित गुन्हेगारी नियंत्रण काद्यान्वये (मोक्का) कारवाई करून अटक केली होती. तो २५ ऑगस्टपासून येरवडा कारागृहात होता. १७ ऑक्टोबर रोजी येरवडा पोलिसांनी त्याला एका गुन्ह्यात त्याचा पुन्हा ताबा घेतला होता. सोमवारी आरोपी निखिल याच्या पोटात दुखत असल्याचे पोलिसांना सांगितले होते. त्यामुळे पोलिसांनी त्या दिवशी त्याला ससून रुग्णालयात नेले. तिथे त्याची तपासणी करण्यात आली.
रात्री साडेनऊच्या सुमारास गाडी गुंजन चौकात आल्यानंतर आरोपी कांबळेने उलटी होत असल्याचे पोलिसांना सांगितले. त्यामुळे पोलिसांनी गुंजन चौकात एका ठिकाणी गाडी थांबविली. पाठीमागचा दरवाजा उघडताच आरोपी कांबळेने काही कळायच्या आतमध्येच गाडीतून बाहेर उडी मारत पलायन केले. त्याच्या हातातील बेडी काढून तो पळल्याचे समोर आले आहे. पोलीस आरोपी निखील याचा शोध घेत आहेत. अशी माहिती पोलिसांनी दिली.
