नसरापूर ता. भोर :वारकरी संप्रदायात सेवाभावाची परंपरा जपणारा एक स्तुत्य उपक्रम पार पडला. विघ्नहर्ता पतसंस्था तसेच माजी जिल्हा परिषद सदस्य चंद्रकांत बाठे व सभापती सुनीता बाठे यांच्या संयुक्त विद्यमाने भोंगवली व कापूरहोळ पंचक्रोशीतील सुमारे १८ दिंडींना अन्नदान किटचे वाटप करण्यात आले.
पंढरपूर आषाढी वारीच्या पार्श्वभूमीवर दरवर्षी हजारो वारकरी पायी वारी करत पंढरपूरची वाट धरतात. त्यांच्या या अध्यात्मिक प्रवासात थोडा हातभार लावण्याच्या उद्देशाने या उपक्रमाचे आयोजन करण्यात आले. प्रत्येक दिंडीला जीवनावश्यक वस्तू, खाद्यधान्य, पाण्याच्या बाटल्या, आणि अन्य उपयुक्त साहित्याने भरलेले किट वितरित करण्यात आले.
कार्यक्रम किकवी गावात पार पडला. यावेळी स्थानिक ग्रामस्थ, वारकरी, दिंडीप्रमुख, आणि संस्था पदाधिकारी मोठ्या संख्येने उपस्थित होते. या प्रसंगी बोलताना माजी जिल्हा परिषद सदस्य चंद्रकांत बाठे म्हणाले, “ही मदत केवळ प्रसिद्धीसाठी नाही, तर आपली सेवा करण्याचा मनोभाव ठेवून केली आहे. आपल्या दिंडीसाठी एक खारीचा वाटा म्हणून हा उपक्रम राबवला जात आहे.”
याशिवाय, विघ्नहर्ता पतसंस्थेच्या सभासदांपैकी अपघातग्रस्त झालेल्या सदस्यांच्या मुलांच्या शिक्षणासाठी आर्थिक मदत देण्यात आली. समाजातील अशा गरजू घटकांसाठी पतसंस्था नेहमीच पुढाकार घेत असून, समाजसेवेच्या कार्यात सातत्य राखले जात आहे.
या उपक्रमामुळे वारकरी बंधूंमध्ये समाधानाची भावना दिसून आली. दिंडीप्रमुख आणि वारकऱ्यांनी या मदतीबद्दल समाधान व्यक्त करत बाठे कुटुंबीयांचे आणि विघ्नहर्ता पतसंस्थेचे आभार मानले. समाजाप्रती बांधिलकी जपणारा आणि श्रद्धा-सेवा यांचा संगम साधणारा हा उपक्रम आदर्शवत ठरला.
