पुणेः शहरातील गुन्हाच्या घटना सातत्याने वाढताना दिसत आहेत. गेल्या काही दिवसांपासून अनैतिक संबंधातून हत्या करण्यात आल्याच्या घटना घडलेल्या आहेत. अशा घटनांमुळे शहरात एकच खळबळ उडाली आहे. अशीच एक अनैतिक संबंधात अडसर ठरणाऱ्या तरुणाच्या डोक्यात दगड घालून हत्या करण्यात आल्याची घटना घडली आहे.
अनैतिक संबंधात अडसर ठरणाऱ्या एका तरुणाचा डोक्यात दगड घालून खून करण्यात आल्याची धक्कादायक घटना उघडकीस आली आहे. या प्रकरणी मयत अनिलचा भाऊ सुनील ठाकूर (वय ३२) याने लोणीकंद पोलीस ठाण्यात फिर्याद दिली आहे. त्याच्या फिर्यादीवरून पोलिसांनी मयत तरुणाच्या आईसह तिच्या प्रियकराला अटक केली आहे.
अनिल लालसिंग ठाकूर (वय ३०) असे खून झालेल्या तरुणाचे नाव आहे. त्याची आई सुमित्रा हिचे प्रफुल्ल नामक व्यक्तीशी अनैतिक संबंध असल्याची कुणकुण त्याला लागली होती. यावरून त्याचे आईसोबत भांडण झाले होते. सुमित्रा आणि तिची दोन्ही मुले मूळचे उत्तर प्रदेश मधील असून, ते मजुरीचे काम करण्यासाठी येथे स्थायिक झाले. पेरणे फाटा परिसरातील वाघमारे वस्ती भागात ते राहायला आहेत. याच भागात राहणाऱ्या प्रफुल्लसोबत सुमित्राचे अनैतिक संबंध होते.
बुधवारी मध्यरात्री सुमित्रा तिचा प्रियकर प्रफुल्ल याच्यासोबत अनिलला घेऊन वाद झाला. हा राग इतका टोकाला गेला की, प्रफुल्ल आणि सुमित्रा यांनी अनिलला शिवीगाळ करीत माराहण करून त्याच्या डोक्यात दगड घातला. या घटनेत गंभीर झालेल्या अनिलला तातडीने रुग्णालयात दाखल करण्यात आले मात्र, त्याचा उपचारापूर्वीच मृत्यू झाला.
याप्रकरणी अनिलची आई सुमित्रा लालसिंग ठाकूर (वय ५५, रा. वाघमारे वस्ती, पेरणे फाटा, नगर रस्ता) हिला अटक करण्यात आली. सुमित्राचा प्रियकर प्रफुल्ल पुंडलिक ताथोड (वय ३४, रा. वाघमारे वस्ती, पेरणे फाटा, नगर रस्ता) याच्याविरुद्ध गुन्हा दाखल करण्यात आला असून त्याचा शोध पोलीस घेत आहेत. या घटनेचा तपास सहाय्यक पोलीस निरीक्षक घोरपडे हे करीत आहेत.
