पुणेः प्रतिनिधी वर्षा काळे
महापालिकेकडून पुणे शहराला पाणीपुरवठा करणाऱ्या जलकेंद्रातील वीजपुरवठा सातत्याने खंडित होत असल्याने पाणीपुरवठा विस्कळीत होत आहे. जलकेंद्रातील महावितरणाच्या ट्रान्सफाॅर्मरमध्ये सातत्याने बिघाड होत असून, या संदर्भात कायमस्वरूपी उपाययोजना कराव्यात या महापालिकेच्या पत्रव्यवहाराला महावितरणकडून केराची टोपली दाखविली जात आहे. त्यामुळे महावितरणापुढे महापालिका हतबल ठरल्याचे चित्र पाहायला मिळत आहे.
पुणे शहराला पाणीपुरवठा करण्यासाठी खडकवासला धरण साखळी प्रकल्पातून महापालिका प्रतिदिन पाणी घेते. हे पाणी सिंहगड रस्त्यावरील मुख्य जलकेंद्रात येते, त्यानंतर संपूर्ण प्रक्रिया झाल्यानंतर पर्वती, खडकवासला, पद्मावती, वारजे, लष्कर, चतु:शृंगी, एसएनडीटी अशा प्रमुख जलकेंद्रांतून शहराच्या विविध भागाला पाणीपुरवठा केला जातो.
सध्या पावसाळ्याचे दिवस असल्याने शहरात जोरदार पाऊस सुरू आहे. गेल्या काही दिवसांपासून त्याचा परिणाम विद्युत पुरवठ्यावर होत आहे. पाणीपुरवठा करण्यासाठी जलकेंद्रात महावितरणने ट्रान्सफाॅर्मर बसविली आहेत. त्यामध्ये सातत्याने बिघाड होत असून, कधी ट्रान्सफाॅर्मरमध्ये बिघाड होणे, तर केबल तुटणे यामुळे जलकेंद्राचा वीजपुरवठा सातत्याने काही काळ खंडित राहतो. अशा कारणांमुळे पंपिंग स्टेशनचे काम बंद पडत आहे. त्यामुळे काही भागाला पाणीपुरवठा करण्यास अडचणी येत आहेत. पाणीपुरवठा बंद झाल्यानंतर नागरिकांच्या रोषालाही महापालिकेच्या अधिकाऱ्यांना सामोरे जावे लागत आहे.जलकेंद्रातील बिघाडामुळे नियमित वेळेत पाणीपुरवठा होऊ शकला नाही. काही भागात उशिरा पाणी आल्याने नागरिकांची गैरसोय झाली. ऐन पावसाळ्यात आणि धरणे तुडुंब भरलेली असतानाही या प्रकाराला सामोरे जावे लागत असल्याची वस्तुस्थिती पुणे शहरात पाहिला मिळत आहे.
