शिक्रापूर/शेरखान शेख
शिक्रापूर पोलीस स्टेशनमध्ये एक अजबच प्रकार घडला आला आहे. नागरिकांनी मोबाईल चोरीच्या गुन्ह्यातील आरोपीला पकडून पोलीस स्टेशनमध्ये आणल्यानंतर गुन्हा दाखल केला, तर जीव देईल असे म्हणत खिडकीवर जोरजोरात डोके आपटून आरोपीने आत्महत्या करण्याचा प्रयत्न केला आहे. यामुळे त्याच्या डोक्याला रक्तस्त्राव झाल्याने पोलिसांनी तत्काळ त्यास रुग्णालयात हलवल्याने मोठा अनर्थ टळला आहे.
पोलीस ठाण्यातील खडकीवरच आदळलं डोकं
पोलिसांनी दिलेल्या माहितीनुसार, शिक्रापूर पोलीस स्टेशनमध्ये पोलीस हवालदार बापू हाडगळे, पोलीस शिपाई प्रतिक जगताप, महिला पोलीस शिपाई काजल सरोदे हे त्यांचे कर्तव्य बजावत असताना एका युवतीचा मोबाईल हिसकावणाऱ्या परमेश्वर धेवडे या इसमाला नागरिकांनी पकडून आणले. या इसमाने फिर्यादी युवतीला तुला नवीन मोबाईल देतो, असे म्हणत आरडाओरडा करुन पोलिसांना माझ्यावर गुन्हा दाखल करु नका, नाहीतर मी जीवच देईल असे म्हणून पोलीस ठाण्यातील खिडकीवर जोरजोरात डोके आपटून आत्महत्या करण्याचा प्रयत्न केला.
यावेळी त्याच्या डोक्याला दुखापत होऊन रक्तस्त्राव होऊ लागल्याने पोलिसांनी त्याला उपचारासाठी रुग्णालयात हलवले. तर याबाबत पोलीस शिपाई प्रतिक भाऊसाहेब जगताप रा. शिक्रापूर ता. शिरुर जि. पुणे यांनी शिक्रापूर पोलीस स्टेशन येथे दिलेल्या फिर्यादीनुसार पोलिसांनी परमेश्वर नागनाथ धेवडे वय २४ वर्षे रा. सणसवाडी ता. शिरुर जि. पुणे याच्या विरुद्ध गुन्हा दाखल केला असून, पुढील तपास पोलीस निरीक्षक दिपरतन गायकवाड यांच्या मार्गदर्शनाखाली पोलीस हवालदार रविकिरण जाधव हे करत आहे.
