इम्रान आतार,भोर
भोर, प्रतिनिधी : भोर तालुक्यातील वेणुपुरी हद्दीतील नीरा देवघर धरणात पोहण्यासाठी उतरलेल्या पुणे जिल्ह्यातील लोणी काळभोर येथील चार मित्रांपैकी एका तरुणाचा पाण्यात बुडून मृत्यू झाल्याची दुर्दैवी घटना रविवारी (ता. २१) पहाटे सहा ते साडेसहा वाजण्याच्या सुमारास घडली. देवेश राज मिश्रा (वय २८, रा. लोणी काळभोर, ता. हवेली) असे मृत्यू झालेल्या तरुणाचे नाव असून, याप्रकरणी त्यांचे नातेवाईक राजकुमार गौरीशंकर मिश्रा यांनी भोर पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, लोणी काळभोर येथील चार मित्र शनिवारी रात्री पर्यटनासाठी भोर तालुक्यातील वेणुपुरी परिसरात आले होते. रविवारी पहाटे सर्वजण नीरा देवघर धरणाच्या पाण्यात पोहण्यासाठी उतरले. यावेळी देवेश मिश्रा यांना पाण्याच्या खोलीचा अंदाज न आल्याने त्यांचा तोल गेला आणि ते खोल पाण्यात बुडाले. मित्रांनी तातडीने त्यांचा शोध घेण्याचा प्रयत्न केला, मात्र त्यात यश न आल्याने पोलिसांना माहिती देण्यात आली.
घटनेची माहिती मिळताच भोर पोलिस ठाण्याचे पोलिस निरीक्षक निलेश माने यांच्या मार्गदर्शनाखाली हिर्डोशी बिट अंमलदार अजय साळुंके, पोलिस कर्मचारी अभय बर्गे, राजेंद्र दुरगुळे, हेमंत भिलारे तसेच कोंढरीचे पोलिस पाटील शंकर पारठे यांनी घटनास्थळी धाव घेतली. भोईराज जल आपत्ती संघाचे उमेश गुजर, जगन शिर्के, शंभू सागळे, मंगेश कांबळे, विष्णू मोहिते व सुनील पवार यांनी पोलिसांच्या मदतीने अथक शोधमोहीम राबविली. काही तासांच्या प्रयत्नांनंतर देवेश मिश्रा यांचा मृतदेह पाण्याबाहेर काढण्यात आला.
घटनास्थळापासून वेणुपुरी गाव सुमारे दीड किलोमीटर अंतरावर असून परिसर पूर्णपणे डोंगराळ असल्याने मृतदेह रुग्णवाहिकेपर्यंत आणण्यासाठी पोलिस, बचाव पथक आणि ग्रामस्थांना भर उन्हात मोठी कसरत करावी लागली. अखेर मृतदेह डोंगराळ मार्गाने वाहून आणत रुग्णवाहिकेतून भोर उपजिल्हा रुग्णालयात शवविच्छेदनासाठी पाठविण्यात आला.
