भोर, प्रतिनिधी : भोर-महाड महामार्गावरील वेनवडी गावाच्या हद्दीत वनविभागाने धडक कारवाई करत खैर लाकडांची अवैध वाहतूक करणारे पिकअप वाहन पकडले. सोमवारी (ता. २२) पहाटे साडेबारा वाजण्याच्या सुमारास करण्यात आलेल्या या कारवाईत सुमारे चार लाख रुपयांचा मुद्देमाल जप्त करण्यात आला आहे.
वनविभागाच्या पथकाकडून महामार्गावर नियमित वाहन तपासणी सुरू असताना पांढऱ्या रंगाचे पिकअप वाहन (एमएच १२ डब्ल्यूएक्स २०७१) संशयास्पद आढळल्याने ते थांबवून तपासणी करण्यात आली. यावेळी वाहनामध्ये खैर प्रजातीच्या लाकडांचे ओंडके आढळून आले. संबंधितांकडे लाकडांच्या वाहतुकीसाठी आवश्यक परवानगी अथवा वैध कागदपत्रे नसल्याचे निदर्शनास आल्यानंतर वाहन ताब्यात घेण्यात आले.
या कारवाईत अंदाजे एक लाख रुपये किंमतीची खैराची लाकडे तसेच सुमारे तीन लाख रुपये किंमतीचे पिकअप वाहन असा एकूण चार लाख रुपयांचा मुद्देमाल जप्त करण्यात आला. या प्रकरणी भरत बबन चव्हाण (रा. आखले, ता. जि. सातारा) यांच्याविरुद्ध वन कायद्यानुसार गुन्हा दाखल करण्यात आला असून पुढील कारवाई सुरू आहे.
पुणे येथील उपवनसंरक्षक अभिजीत वायकोस तसेच सहाय्यक वनसंरक्षक शितल राठोड यांच्या मार्गदर्शनाखाली भोरचे वनक्षेत्रपाल शिवाजी राऊत यांच्या नेतृत्वाखाली ही कारवाई करण्यात आली. या पथकामध्ये वनपाल सुग्रीव मुंढे, वनरक्षक के. एम. हिमोणे व वनरक्षक सुदाम राठोड यांनी सहभाग घेतला.
जप्त करण्यात आलेले पिकअप वाहन व खैर लाकडांचा साठा वनविभागाच्या ताब्यात घेऊन भोर येथील वनविभागाच्या डेपोमध्ये जमा करण्यात आला आहे. या प्रकरणाचा पुढील तपास वनपाल सुग्रीव मुंढे यांच्या मार्गदर्शनाखाली सुरू असून अवैध वृक्षतोड व लाकूड तस्करीविरोधात वनविभागाकडून कारवाईचा बडगा कायम राहणार असल्याचे सांगण्यात आले.
