भोर, प्रतिनिधी : भोर तालुक्यातील शिंदेवाडी येथे जुन्या पुणे-सातारा महामार्गालगत सुरू असलेल्या जुगार अड्ड्यावर राजगड पोलिसांनी धाड टाकून मोठी कारवाई केली. या कारवाईत सहा जणांना ताब्यात घेण्यात आले असून तब्बल ३० लाख ६५ हजार ६२० रुपयांचा मुद्देमाल जप्त करण्यात आला आहे.
याप्रकरणी राजगड पोलीस ठाण्याचे पोलीस कॉन्स्टेबल पप्पु रामा शिंदे यांनी फिर्याद दिली असून त्यावरून संबंधितांविरुद्ध गुन्हा दाखल करण्यात आला आहे.
पोलिसांना मिळालेल्या गोपनीय माहितीनुसार शिंदेवाडी गावाच्या हद्दीत हॉटेल आमराईजवळील पत्र्याच्या शेडमध्ये ‘सोरट’ नावाचा जुगार सुरू असल्याची माहिती मिळाली होती. त्यानुसार पोलिसांनी गुरुवारी सायंकाळी छापा टाकला. कारवाईदरम्यान काही जण घटनास्थळावरून पसार झाले, तर सहा जणांना ताब्यात घेण्यात आले.
या प्रकरणात सचिन अंकुश बागल, मनोज दिनकर काळाणे, सशांक मच्छीद्र मेमाणे, गणेश पाडुरंग वाळुंज, धनाजी राजाभाऊ जाधव आणि निखील रामचंद्र तुगंतकर यांच्यावर गुन्हा दाखल करण्यात आला आहे.
छाप्यात जुगारासाठी वापरण्यात येणारे डिजिटल सोरट मशीन, टेबल, खुर्च्या, जुगाराचे चार्ट, वह्या, कच्च्या स्लिपा, टोकन, विविध कंपन्यांचे मोबाईल फोन, रोख रक्कम तसेच दुचाकी आणि चारचाकी वाहने असा मोठा मुद्देमाल जप्त करण्यात आला. जप्त वाहनांमध्ये अनेक दुचाकींसह महिंद्रा एक्सयूव्ही ७०० या चारचाकी वाहनाचाही समावेश आहे.
पोलिसांनी जप्त केलेल्या मुद्देमालामध्ये २ लाख ११ हजार ६२० रुपयांची रोख रक्कम, विविध कंपन्यांचे मोबाईल फोन तसेच जुगाराच्या व्यवहारासाठी वापरण्यात येणारे साहित्य आढळून आले. या कारवाईमुळे परिसरात खळबळ उडाली असून जुगार व्यवसायाविरोधात पोलिसांनी कठोर भूमिका घेतल्याचे स्पष्ट झाले आहे.
राजगड पोलीस ठाण्याचे पोलीस निरीक्षक जाधव यांच्या मार्गदर्शनाखाली ही कारवाई करण्यात आली. पुढील तपास सहाय्यक पोलीस निरीक्षक राठोड करीत असून फरार झालेल्या संशयितांचा शोध सुरू आहे.
