नसरापूर, प्रतिनिधी : पुणे-बंगळुरू राष्ट्रीय महामार्गावरील शिंदेवाडी येथील नवीन बोगद्याजवळ एका व्यावसायिकाला अडवून तब्बल ११ बाईकस्वारांनी बेदम मारहाण करत वाहनाची तोडफोड केल्याची धक्कादायक घटना समोर आली आहे. या प्रकरणी राजगड पोलीस ठाण्यात दहा दुचाकी क्रमांकधारकांसह दोन अज्ञात इसमांविरुद्ध गुन्हा दाखल करण्यात आला असून, पोलिसांनी आरोपींचा शोध सुरू केला आहे.
पोलिसांकडून मिळालेल्या माहितीनुसार, फिर्यादी सोहेल रज्जाक मुलाणी (वय ३०) हे २१ जून रोजी सकाळी सुमारे ७.१५ वाजता खेडशिवापूर दर्ग्याकडे जात होते. त्यावेळी शिंदेवाडी गावाच्या हद्दीतील नवीन बोगद्याजवळ विविध स्पोर्ट्स बाईकवरून आलेल्या युवकांनी त्यांची गाडी अडवली. त्यापैकी एका युवकाने, “तुझी गाडी माझ्या गाडीला घासली आहे,” असा आरोप करत वाद घालण्यास सुरुवात केली.
काही क्षणांतच हा वाद हाणामारीत बदलला. उपस्थित बाईकस्वारांपैकी पाच ते सहा जणांनी सोहेल मुलाणी यांना लाथाबुक्क्यांनी मारहाण केली. तसेच हातात घातलेल्या स्टीलच्या ग्लोव्हजनेही त्यांच्यावर हल्ला करण्यात आल्याचा आरोप फिर्यादीने केला आहे. या हल्ल्यात ते जखमी झाले.
मारहाणीनंतर आरोपींनी फिर्यादीच्या वाहनाची तोडफोड करत दोन्ही बाजूंचे आरसे फोडले तसेच वाहनाच्या विविध भागांचे नुकसान केले. या प्रकारात सुमारे सात लाख रुपयांचे नुकसान झाल्याचा दावा फिर्यादीने तक्रारीत केला आहे.
घटनेनंतर फिर्यादीने राजगड पोलीस ठाण्यात तक्रार दाखल केली. त्यानुसार पोलिसांनी संबंधित दुचाकी क्रमांकांच्या आधारे संशयितांविरुद्ध गुन्हा दाखल केला आहे. घटनास्थळ परिसरातील सीसीटीव्ही फुटेज, महामार्गावरील देखरेख कॅमेरे तसेच वाहनांच्या नोंदणीची माहिती तपासून आरोपींची ओळख पटविण्याचे काम सुरू आहे.
या प्रकरणाचा पुढील तपास पोलीस निरीक्षक संतोष जाधव यांच्या मार्गदर्शनाखाली राजगड पोलीस ठाण्याचे सहायक पोलीस निरीक्षक मछले करीत आहेत.
