सासवड (प्रतिनिधी) : पुरंदर तालुक्यातील सासवड-कापूरहोळ रस्त्यावर भिवडी गावाजवळ मंगळवारी (दि. २२ जुलै) दुपारी बाराच्या सुमारास दुचाकी व टँकर यांच्यात झालेल्या भीषण अपघातात दुचाकीवरील तरुण व तरुणीचा जागीच मृत्यू झाला. या अपघातानंतर परिसरात हळहळ व्यक्त करण्यात येत असून, सासवड पोलिसांनी टँकर चालकाला ताब्यात घेतले आहे.
या अपघातात नंदू रत्नाकर होले (वय २३, रा. खानवडी, ता. पुरंदर) आणि अपूर्वा रवींद्र कुंभारकर (वय २३, रा. कुंभारवळण, ता. पुरंदर) या दोघांचा मृत्यू झाला आहे. अपघातानंतर टँकरचालक हरिबा भिवा टोणे याला पोलिसांनी अटक केली आहे.
सासवडकडून नारायणपूरकडे भरधाव निघालेली दुचाकी (एमएच १२ एक्सव्ही ९४४२) भिवडीजवळील हॉटेल रुद्राजवळ आली असता, दुचाकीवरील चालकाचा वेगावर ताबा सुटला. त्यामुळे दुचाकीची इंडियन ऑइलच्या टँकर (एमएच १२-६८४३) सोबत समोरासमोर जोरदार धडक झाली.
धडक इतकी भीषण होती की, दोघांचा जागीच मृत्यू झाला. घटनेची माहिती मिळताच पोलीस शिपाई थोरवे व पोलीस कांबळे यांनी घटनास्थळी धाव घेतली व पंचनामा केला. पुढील तपास पोलीस निरीक्षक ऋषिकेश अधिकारी यांच्या मार्गदर्शनाखाली सासवड पोलीस करत आहेत.
