भोर : नगरपालिकेच्या निवडणुकीला अवघे काही दिवस बाकी असताना राजकीय तापमान कमालीचे वाढले असून शहरातील चर्चेचा केंद्रबिंदू ठरला आहे — ‘घड्याळाची टीक-टीक’. भोरकरांचा राजकीय कल राष्ट्रवादीकडे झपाट्याने वळत असल्याचे चित्र सध्या दिसत असून यामुळे भाजपला अपेक्षित असलेले २१-० चे स्वप्न धूसर होत असल्याच्या चर्चा सुरू आहेत.
प्रचार सभांत आणि घरोघरी भेटीदरम्यान राष्ट्रवादी काँग्रेसच्या उमेदवारांना मिळत असलेला उत्स्फूर्त प्रतिसाद लक्षवेधी ठरत आहे. तरुण, व्यावसायिक वर्ग आणि पहिल्यांदाच मतदान करणाऱ्या मतदारांचा राष्ट्रवादीकडे वाढता ओढा विरोधकांसाठी चिंता वाढवणारा ठरत आहे. अत्यल्प कालावधीत आमदार शंकर मांडेकर यांनी केलेल्या विकासकामांचा ठसा मतदारांच्या मनात स्पष्टपणे उमटल्याचे चित्र आहे. रस्ते, पाणीपुरवठा, ग्रामीण-शहरी संपर्क सुधारणा, युवा उपक्रम तसेच तातडीच्या निधीची लवकर उपलब्धता यामुळे ‘काम करणारा नेता’ ही प्रतिमा ठळकपणे पुढे आली आहे.
दुसरीकडे गेल्या अनेक वर्षांत विरोधकांनी शहराच्या विकासाकडे दाखवलेली उदासीनता व प्रामुख्याने आश्वासनांवर चालवलेला राजकारणाचा खेळ यामुळे मतदारांमध्ये नाराजी खोलवर पसरलेली आहे. “केवळ आश्वासने नव्हे तर काम करणाऱ्यांना संधी” अशी मतदारांची भावना प्रचारादरम्यान अनेकदा व्यक्त होताना दिसत आहे. यामुळे यंदाच्या निवडणुकीत मतांचे समीकरण मोठ्या प्रमाणात बदलण्याची शक्यता राजकीय पंडितांनी व्यक्त केली आहे.
तोपर्यंत राष्ट्रवादीचे नगराध्यक्ष पदाचे उमेदवार रामचंद्र नाना आवरे यांच्याविषयी नागरिकांमध्ये सकारात्मक लाट दिसून येत आहे. अनेक वर्षांच्या सातत्यपूर्ण सामाजिक कार्याची दखल मतदार घेत असल्याने राष्ट्रवादीच्या विजयाची शक्यता अधिक बळकट होत असल्याचे जाणकारांचे म्हणणे आहे.
निवडणुकीसाठी केवळ काहीच दिवस उरले असताना दोन्ही पक्ष प्रचारात पूर्ण ताकदीने उतरलेले आहेत. मात्र सध्या तरी भोर शहराच्या राजकीय वातावरणात ‘घड्याळाची टीक-टीक’ जोरात ऐकू येत असल्याचे चित्र ठळकपणे उमटत आहे. पुढील काही दिवसांत हे चित्र कायम राहते की भाजप पलटवार करते, हे पाहणे औत्सुक्याचे ठरेल.
