भोरः नाशिकमधील येवला येथे छत्रपती शिवाजी महाराज शिवसृष्टी उभारण्यात आलेली आहे. या शिवसृष्टीचे उद्घाटन राज्याचे उपमुख्यमंत्री अजित पवार आणि मंत्री गिरीष महाजन यांच्या प्रमुख उपस्थितीमध्ये पार पडले. या कार्यक्रमावेळी मंत्री छगन भुजबळ (chagan bhujabal) यांनी भाषण केले. या भाषणात त्यांनी शिवाजी महाराजांसोबत असलेल्या मावळ्यांच्या जातीचा उल्लेख केला. सरनोबत येसाजीराव कंक यांची जात कोळी असल्याचे सांगितले. यामुळे कंक यांचे वंशज सिद्धार्थ संजय कंक (sidharth kank) यांनी याचा निषेध व्यक्त करीत भुजबळांनी केलेल्या उल्लेखाचा समाचार घेतला.
छगन भुजबळ तुमच्या जातीय राजकारणासाठी आम्हा मावळ्यांची जात बदलू नका. जरा नीट अभ्यास करून या. सरनोबत येसाजीराव कंक हे मराठा समाजाचे होते आणि त्यांच्या पुढच्या सर्व पिढ्या सुद्धा अभिमानाने हिंदू मराठा असल्याचे सांगत आम्ही आमची जात आणि इतिहास शाबूत राखला आहे. आम्ही प्रत्येक समाजाचा आदर करतो, परंतु तुम्ही तुमच्या गलिच्छ राजकारणासाठी स्वराज्याची सेवा केलेल्या मावळ्यांची जात आणि इतिहास बदलायला पाहू नका, नाहीतर हे महागात पडेल असा इशारा येसाजीराव कंक यांचे वंशज सिद्धार्थ कंक यांनी भुजबळांना दिला आहे.