नसरापूर , ता. १६ : राजगड पोलीस ठाण्याच्या हद्दीतील मौजे गाव परिसरात मधुशाळा बारजवळ सुरू असलेल्या कथित कल्याण मटका जुगार अड्ड्यावर पोलिसांनी धाडसी कारवाई करत सहा जणांविरुद्ध गुन्हा दाखल केला आहे. या कारवाईमुळे परिसरातील अवैध जुगार व्यवसायाला आळा बसण्यास मदत होणार असल्याची प्रतिक्रिया नागरिकांकडून व्यक्त होत आहे.
राजगड पोलीस ठाण्यातील पोलीस कॉन्स्टेबल पप्पु रामा शिंदे यांनी दिलेल्या फिर्यादीनुसार, १५ जून २०२६ रोजी रात्री सुमारे ९.४५ वाजण्याच्या सुमारास गावच्या हद्दीत एका बारच्या बाजूला असलेल्या मोकळ्या जागेत काही व्यक्ती बेकायदेशीरपणे कल्याण मटका जुगार चालवत असल्याची माहिती पोलिसांना मिळाली होती. या माहितीच्या आधारे पोलिसांनी तात्काळ घटनास्थळी छापा टाकला.
या कारवाईदरम्यान गणेश रघुनाथ जाधव (वय ५२, रा. केळवडे), अनिल एकनाथ भिलारे (वय ५३, रा. नसरापूर), रमेश हरिश्चंद्र नाईक (वय ४५, रा. सह्याद्री सिटी बिल्डिंग, नसरापूर), शिवलिंग मलया गुत्तेदार (वय ५०, रा. नसरापूर), जावेद बादशाह मुलाणी (वय २७, रा. नसरापूर) आणि प्रदीप शंकर धुमाळ (वय ४२, रा. केळवडे) या सहा जणांना ताब्यात घेण्यात आले. पोलिसांनी त्यांच्याकडून जुगारासाठी वापरली जाणारी रोख रक्कम, पावती पुस्तके, कार्बन पेपर तसेच बॉलपेन असा एकूण ४ हजार २३० रुपयांचा मुद्देमाल जप्त केला.
प्राथमिक तपासात आरोपी हे कल्याण मटका जुगाराचे आकडे चिठ्ठ्यांवर स्वीकारून बेकायदेशीररीत्या सट्टा व्यवसाय चालवत असल्याचे निष्पन्न झाले आहे. याप्रकरणी गुन्हा नोंद करण्यात आला असून पुढील तपास पोलीस निरीक्षक संतोष जाधव यांच्या मार्गदर्शनाखाली पोलिस हवालदार तळपे करीत आहेत.
